ޓްރާންސްޕޯޓް އޮތޯރިޓީން ހެދި އަގުތައް ޑްރައިވަރުން ބަލައި ނުގަންނަ ކަމަށް ބުނެ ބައެއް ސެންޓަރުތަކުން އެއާޕޯޓަށާއި ހުޅުމާލެއަށް ކުރަމުން އައި ޓެކްސީ ދަތުރުތައް ހުއްޓާލައިފިއެވެ.
ދަތުރުކުރުން ހުއްޓަލި ޓެކްސީ ސެންޓަރަކުން ބުނީ މާލޭގައި ކުރާ ދަތުރަކަށް 25 ރުފިޔާ ލިބިފައި އެއާޕޯޓަށް 35 ރުފިޔާއަށް ދަތުރުކުރުމަކީ ދެކޮޅު ޖެހޭ ކަމެއް ނޫން ކަމަށެވެ. ސަބަބަކީ ގިނަ ފަހަރު އެއާޕޯޓުން އެނބުރި އަންނަން ޖެހެނީ ހުހަށް ކަމަށްވުމުން ކަމަށެވެ.
މީގެ އިތުރުން އެއާޕޯޓަށް 35 ރުފިޔާ ދަތުރުކުރަންޖެހެއިރު ހުޅުމާލެއަށް 40 ރުފިޔާއަށް ދަތުރު ކުރަންޖެހުމަކީވެސް ބަލައިގަނެވޭނެ ކަމެއް ނޫން ކަމަށެވެ.
ސަބަބަކީ ދަތުރުގެ ދިގުމިނަށް ބަލައިފިނަމަ ހުޅުމާލެއަށް ކުރަންޖެހޭ ދަތުރުގެ ދިގުމިން ދެގުނައަށް ދުރުވެފައި އިތުރުވަނީ އެންމެ 5 ރުފިޔާ ކަމަށްވުމުން ކަމަށެވެ.
އެ ސެންޓަރުން ބުނީ އަގުތައް ހެދީ ރައީސް ޔާމީނުގެ ސަރުކާރުން ނަމަވެސް ތަންފީޒުކުރަން ފުލުހުން ނުކުތީ އިއްޔެ ކަމަށެވެ. އަދި ފުލުހުން ނެރުމުގެ ކުރިން ޓްރާންސްޕޯޓް އޮތޯރިޓީން ޓެކްސީ ސެންޓަރުތަކާއި އެއްވެސް ވަރަކަށް މަޝްވަރާ ނުކުރާ ކަމަށެވެ. 3327979 ނަމްބަރުން މިއަދުވެސް ގެންދަނީ ޓްރާންސްޕޯޓް އޮތޯރިޓީގެ އަގުތަކަށް ޚިދުމަތް ދެމުންނެވެ.
އެ ސެންޓަރުން ބުނީ އެ ސެންޓަރުންވެސް ކަރާއި ވޭނުގެ ޚިދުމަތް ދެމުން އަންނަ ކަމަށެވެ. އަދި ދަތުރުކުރާނީ ޓްރާންސްޕޯޓް އޮތޯރިޓީގެ އަގުތަކަށް ކަމަށެވެ. "އަޅުގަނޑުމެން މިނަގަނީ އެއާޕޯޓަށް 35 ރުފިޔާ، ހުލުމާލެއަށް 40 ރުފިޔާ. ވޭނުގެ އަގު ތަފާތުވާނެ."
