އިންޑޮނޭޝިއާގައި އަލިފާން ފަރުބަދައެއް ގޮވުމުގެ ސަބަބުން އުފެދުނު ސުނާމީއެއްގައި ގިނަ ބަޔަކު މަރުވުމާއި ގުޅިގެން އެގައުމުގެ ރައީސް ޖޯކޯ ވިޑޯޑޯ އަށް ރައީސް އިބްރާހިމް މުހައްމަދު ސޯލިހް މިއަދު ތައުޒިޔާ ވިދާޅުވެއްޖެ އެވެ.
ރައީސް ސޯލިހް ފޮނުއްވި ތައުޒިޔާ މެސެޖްގައި ވިދާޅުވެފައިވަނީ، އިންޑޮނޭޝިއާގެ ސުންޑާ ސްޓްރެއިޓްއަށް ސުނާމީއަރައި އެތައްބަޔަކު މަރުވެ، ގެތަކަށާއި މުދަލަށް ގެއްލުން ލިބުނު ހަބަރު އަޑުއެހީ ފުން އަސަރާއި ހިތާމައާއެކު ކަމަށާއި ރާއްޖޭގެ ހުރިހާ ރައްޔިތުންގެ ނަމުގައި އެގައުމުގެ ރައީސަށާއި ގައުމުގެ ރައްޔިތުންނަށް ތައުޒިޔާ ފޮނުވާ އެހިތާމައިގައި ބައިވެރިވާ ކަމަށެވެ.
އިންޑޮނީޝިއާގައި އަލިފާން ފަރުބަދައެއް ގޮވުމުގެ ސަބަބުން އުފެދުނު ސުނާމީއެއްގައި، މިހާތަނަށް 200 އަށްވުރެ ގިނަ މީހުން މަރުވެފައިވާކަމަށް އެ ގައުމުގެ ކަމާބެހޭ އިދާރާތަކުން ވަނީ ބުނެފި އެވެ. ސުންޑާ ސްޓްރެއިޓްގައި ހިނގި އެ ހާދިސާގައި އެތަކެއް ސަތޭކަ އިމާރާތަކަށް ވެސް ވަނީ ގެއްލުން ލިބިފައެވެ.
ސުނާމީ އަރަން މެދުވެރިވީ، އެ ސަރަހައްދުގައި އޮންނަ ކްރަކަޓާއޯ އަލިފަން ފަރުބަދަ ގޮވައިގެން ކަމަށް ވެސް ވަނީ ލަފާކޮށްފަ އެވެ. ސުންޑާއަކީ އިންޑޮނީޝިއާގެ ދެ ރަށެއް ކަމުގައިވާ ސުމާޓްރާ އާއި ޖާވާ އާ ދެމެދު އޮންނަ ހަނި ސަރަހައްދެކެވެ.
