ސަރުކާރުގެ ސިޔާސީ މަޤާމުތަކަށް އަލަށް ޢައްޔަނު ކުރައްވާފައިވާ ފަރާތްތައް މަސައްކަތަށް އަހުލުވެރި ކުރުމުގެ ގޮތުން ތަމްރީނު ޕްރޮގުރާމެއް ކުރިއަށް ގެންގޮސްފިއެވެ. މިއީ ރައީސުލްޖުމްހޫރިއްޔާގެ އޮފީހުން ކުރިއަށް ގެންދެވި ޕްރޮގުރާމެކެވެ.
މި ޕްރޮގްރާމުގައި ކޮރަޕްޝަން ހުއްޓުވުމަށް ކުރެވޭ މަސައްކަތްތަކާބެހޭ ގޮތުންނާއި އަދި މަޤާމުގެ މަސްއޫލިއްޔަތު އަދާކުރެއްވުމުގައި ނަޒާހަތްތެރިކަން އިސްކުރުމާއެކު ކޮރަޕްޝަނަށް މަގުފަހި ނުވާނެ ގޮތަކަށް ކަންކަން އިންތިޒާމު ކުރުމަށް ބާރުއަޅައި އެންޓި-ކޮރަޕްޝަން ކޮމިޝަންގެ ފަރާތުން ބައިވެރިންނަށްް މަޢުލޫމާތު ދީފައިވެއެވެ.
މީގެ އިތުރުން، މި ސެޝަންގައި އޭސީސީގެ މަސައްކަތުގައި ކުރިމަތިވާ ގޮންޖެހުންތަކާއި މައްސަލަތައް އަވަހަށް ތަޙްޤީޤުކޮށް ފިޔަވަޅު އެޅުމުގައި މިހާރު ކުރިމަތިވާ ބައެއް ދަތިތަކާ ބެހޭގޮތުން މަޢުލޫމާތު ދީފައި ވެއެވެ.
އަލަށް ޢައްޔަނު ކުރައްވާފައިވާ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންގެ ތެރެއިން 30 ބޭފުޅުން ބައިވެރިވި މި ޕްރޮގްރާމުގައި މަޢުލޫމާތު ދެއްވީ އޭސީސީގެ ނާއިބު ރައީސް މުޢައްވިޒް ރަޝީދެވެ.
މި ޕްރޮގުރާމް ކުރިއަށް ގެންދިޔައީ މިދިޔަ ބުރާސްފަތި ދުވަހު އެވެ.
ލިޔުނީ: ޒިދާން މުހައްމަދު
