ދިރާސީ އައު އަހަރުގެ ކިޔެވުން އަންނަ މަހު ފެށޭއިރު، ދަރިވަރުންނަށް ހެނދުނުގެ ނާސްތާ ދޭން އެޑިއުކޭޝަން މިނިސްޓްރީން ހަމަޖައްސާފައިވާތީ، ސްކޫލުތަކުން ދަރިވަރުންނަށް ނާސްތާ ތައްޔާރު ކޮށްދޭނެ ފަރާތްތައް ހޯދަން ބީލަމަށް ހުށަހަޅައިފި އެވެ.
މިޕްރޮގްރާމް ފެށުމުގެ ގޮތުން އެންމެ ފުރަތަމަ ނާސްތާ ދިނުމަށް ހަމަޖެހިފައިވަނީ 25 ސްކޫލަކުންނެވެ. އޭގެ ތެރެއިން ބައެއް ސްކޫލުތަކުން މިހާރު ވަނީ ނާސްތާ ތައްޔާރު ކޮށްދޭނެ ފަރާތްތައް ހޯދަން ބީލަމަށް ހުޅުވާލާފަ އެވެ.
އެގޮތުން ނާސްތާ ތައްޔާރު ކޮށްދޭނެ ފަރާތްތައް ހޯދުމަށް އިއުލާނުކޮށްފައިވާ ބައެއް ސްކޫލުތަކަކީ:
· ނޭކުރަންދޫ ސްކޫލް
· ބުރުނީ ސްކޫލް
· މަދަރުސަތުލް ޝަހީދު ޢަލީ ތަކުރުފާނު، ހއ. ތަކަންދޫ
· ލ.އަތޮޅު މަދަރުސާ
· ގދ. އަތޮޅު ތަޢުލީމީ މަރުކަޒު
· ޝަރަފުއްދީން ސްކޫލް
· އިސްކަންދަރު ސްކޫލް
· އއ. މާޅޮހު ސްކޫލް
· ޏ. އަތޮޅު ތަޢުލީމީ މަރުކަޒު
· އދ. އަތޮޅު މަދަރުސާ
· ވ. އަތޮޅު މަދަރުސާ، ވ. ފުލިދޫ
· ރ. ރަސްމާދޫ ސްކޫލް
އެ ސްކޫލުތަކުން ކުރި އިއުލާނުގައި ބުނީ، ބީލަމުގައި ބައިވެރިވާން އެދޭ ފަރާތްތަކުން އަންނަ ހޯމަ ދުވަހުގެ 14:00 ގެ ކުރިން ސްކޫލަށް ވަޑައިގެން ނުވަތަ އީމެއިލް މެދުވެރިކޮށް ނަން ނޯޓު ކުރަންޖެހޭނެ ކަމަށެވެ. އަދި ބިޑް ހުޅުވުން އޮންނާނީ މިމަހުގެ 31 ވާ ހޯމަ ދުވަހު ކަމަށް ވެސް އިއުލާނުގައި ބުނެފައިވެއެވެ.
ނާސްތާ ޕްރޮގްރާމުގައި ދަރިވަރުންނަށް ފޯރުކޮށްދޭ ކާނާގެ ތާޒާކަން ސްކޫލުތަކުން ބަލަހައްޓާނެ އެވެ. އަދި ކާބޯތަކެތި ތައްޔާރު ކުރާ ތަނުގެ ސާފު ތާހިރުކަން ހުރި ނެތް ގޮތް ވެސް ސްކޫލުތަކުން ބަލަހައްޓަނެއެވެ.
