އައު ސަރުކާރެއް އައީ މުޅި ރާއްޖެ އެދެމުން ދިޔަ ބަދަލު ހޯދައިދިނުމަށް ފޮނި ހުވަފެންތަކެއް ދެކެމުންނެވެ. އެ ހުވަފެންތައް ހަގީގަތަކަށް ހެދުމަށް ސަރުކާރުގެ ފުރަތަމަ 100 ދުވަހު ވެސް އެތައް ކަމެއް ކުރުމަށް ވަނީ ވައުދުވެ ވެފައެވެ.
ފުރަތަމަ 100 ދުވަހު ފުއްދުމަށް ނިންމަވާފައިވާ އެއް ވައުދަކީ ތައުލީމް ހާސިލްކުރާ ދަރިވަރުންނަށް ހެނދުނުގެ ނާސްތާ ސަރުކާރުގެ ހަރަދުގައި ދެވޭ ޕްރޮގުރާމެކެވެ. އެގޮތުން މި ޕޮރޮގުރާމް ފެށުމަށްޓަކައި، ފުރަތަމަ ކުރިއަށް ގެންދާނީ އަޖުމަ ބަލާލުމަށްޓަކައި ޕައިލެޓް ޕްރޮގްރާމެކެވެ.
އެނގޭ ހެއްޔެވެ؟ ޕައިލެޓް ޕޮރޮގުރާމް ކުރިއަށް ދާނީ ރާއްޖޭގެ 25 ސްކޫލެއްގައި އެވެ. އަދި އަންނަ އަހަރު ފަށާ މި ޕައިލެޓް ޕްރޮގްރާމަށް އާންމުގެ ހިޔާލު ހޯދުމަށް މާދަމާ ފޯރަމެއް ބާއްވަން ސަރުކާރުން ނިންމަވާފައެވެ. އާއްމުންގެ ހިޔާލު ހޯދުމަށް އެންމެނަށް ހުޅުވާލައިގެން ބާއްވާ އެ ފޯރަމް އޮންނާނީ މާދަމާ ރޭ 8:30 ގައި އަމީނިއްޔާ ސްކޫލުގައެވެ.
އެޑިއުކޭޝަން މިނިސްޓްރީން ބުނީ، އެ ފޯރަމަކީ ޕައިލެޓް ޕްރޮގުރާމުގެ މައުލޫމާތުދިނުމަށާއި އާންމުންގެ ހިޔާލު ހޯދުމަށް ބެލެނިވެރިންނަށާއި އާންމުންނަށް ހުޅުވާލައިގެން ބާއްވާ ފޯރަމެއް ކަމަށެވެ.
ރަނގަޅު ހިޔާލެއް ހުށައަޅާލަން ބޭނުމިއްޔާ އަވަހަށް ދުރުވާށެވެ.
ލިޔުނީ: ޒިދާން މުހައްމަދު
