ބައެއް މައިންބަފައިންނަށް ޤަބޫލު ކުރެވިފައި އޮންނަނީ އެމީހުންނަސް ލިބޭ ދަރިންނަކީ އެމީހުންގެ އަމިއްލަ މިލްކެއް ކަމަށެވެ. ތަރުބިއްޔަތުކުރަން ޖެހޭނީ އަދި ދަރިންގެ ބޭނުން ހިފަން ޖެހޭނީ އެމީހުން ބޭނުންވާހައި ގޮތަކަށް ކަމަށެވެ. އެފަދައިން ވިސްނާ މީހުންނަށް ޤަބޫލުކުރެވިފައި އޮންނަނީ ދަރިންނަށް ޚަރަދުކުރަނީ އެމީހުންގެ ފައިސާ ކަމަށެވެ. އެހެންވީމާ ދަރިންނަކީ އަގުދީފައި ގަނެފައިވާ އެމީހުންގެ ތަރިކަ މުދާ ގަނޑެއް ކަމަށެވެ. މިއީ ވަރަށް ކުށް ހީތަކެކެވެ.
ދަރިންނަކީ މައިންބަފައިންނާއި ހަވާލުކުރެވޭ ﷲ ތަޢަލާގެ ހައްޤެކެވެ. ތިބާގެ މައްޗަށް ވާޖިބުވެގެންވަނީ ﷲ ތަޢާލާ އެންގެވި ގޮތުގައި ތަރުބިއްޔަތުކުރުމަށެވެ. އެ އަމާނާތަށް ޚިޔާނާތްތެރިވެއްޖެނަމަ ސަލާމަތެއް ނުވެވޭނެއެވެ. ﷲ ތަޢަލާގެ ޙަޟްރަތުގައި ޖެހޭނީ ޖަވާބުދާރީ ވާށެވެ!
ތިބާ ދަރިންނަށް ޚަރަދުކުރަނީ ތިބާގެ އަމިއްލަ ފައިސާ ކަމަށް ހީނުކުރާށެވެ. ދަރިންނާއިއެކު ދަރިންގެ ރިޒްޤް ވެސް ﷲ ތަޢާލާ ޙަވާލުކުރައްވަވައެވެ. ދަރިންނަށް ޚަރަދު ކުރަން ތިބާއާއި ﷲ ތަޢާލާ ޙަވާލު ކުރައްވަވާ ފައިސާ ރަނގަޅު ގޮތުގައި ދަރިންނަށް ހޭދަ ނުކޮށް ތިބާ ބޭނުންވާހައި ކަމަކަށް ހޭދަކުރުމަކީ ވެސް ޖަވާބުދާރީވާން ޖެހޭނެ ކަމެކެވެ.
ދަރިންނަށް ކުރަންޖެހޭ ޚަރަދު ނުކޮށް ދަރިންނަށާއި ދުނިޔޭގެ ކޯޓުތަކަށް ފިލައިގެން ތިބާއަށް އުޅެވިދާނެއެވެ. ނަމަވެސް ﷲ ތަޢާލާގެ ކޯޓަކަށް ނުފިލޭނެއެވެ. ދަރިންނަށްޓަކައި އުފުލަން ޖެހުނު ޒިންމާއިން ޒައްރެއްގެ މިންވަރަށް ވެސް ޖަވާބުދާރީ ނުވެ ސަލާމަތެއް ނުވެވޭނެއެވެ.
ތިބާއަށް 5 ދަރިން ލިބުމުން ދަރިންގެ މައިމީހާ ވަރިކޮށްފައި ގޮސް އެހެން އަންހެނަކާއި ކައިވެނިކޮށް ދަރިން ޙޯދުމަކީ ކުރިން ލިބުނު 5 ދަރިންނަށް ޚަރަދު ނުކުރަން ދެއްކޭނެ އުޒުރެއް ކަމުގައި ހީނުކުރާށެވެ! އެއްވެސް ބައްޕައަކަށް އެންމެ ދަރިއެއްގެ ޚަރަދުންވެސް ސަލާމަތެއް ނުވެވޭނެއެވެ.
ލޮބުވެތި އަޚުންނާއި އުޚުތުންނޭވެ! އެމީހެއްގެ ބެލެނިވެރިކަމުގައި ދަރިން ތިބި މައިން ބަފައިން މިކަންކަމަށް ފުންކޮށް ވަރަށް ރަނގަޅަށް ވިސްނާށެވެ! ދަރިން ތަރުބިއްޔަތު މިކުރެވެނީ ﷲ ތަޢާލާ އަންގަވާފައިވާ ގޮތަށް ކަމާއިމެދުގައެވެ. ދަރިންގެ ޒިންމާތައް އުފުލޭ ގޮތާއިމެދުގައެވެ. ދަރިންނަށް ކުރަންޖެހޭ ޚަރަދު ކުރެވޭ ކަމާއިމެދުގައެވެ.
--އިސްލާމީ ތިލަފަތުގެ ދަރުސަކުން
