ރާއްޖޭގައި ޖަޕާނުގެ އިންވެސްޓްމަންޓުތައް އިތުރުކުރުމާއި ދެ ޤައުމުގެ ވިޔާފާރީގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކޮށްފިއެވެ.
މިކަންކަމަށް މަޝްވަރާ ކުރެއްވީ ރާއްޖޭގެ ޚާރިޖީ ވަޒީރު، އަބްދުﷲ ޝާހިދު، މިހާރު ޖަޕާނަށް ކުރައްވަމުން ގެންދަވާ ދަތުރުފުޅުގެ ތެރެއިން ޖަޕާން އެކްސްޓާނަލް ޓްރޭޑް އޮގަނައިޒޭޝަން (ޖެޓްރޯ) ގެ ރައީސް، މރ. ޔަސޫޝީ އަކަހޯޝީއާ ބައްދަލުކުރެއްވުމުގައެވެ. ޖެޓްރޯގެ ހެޑްކުއާޓަރުގައި އިއްޔެ ބޭއްވުނު މި ބައްދަލުކުރެއްވުމުގައި މިނިސްޓަރ ޝާހިދު ވަނީ ތަފާތު ދާއިރާތަކުން ގުޅުން ބަދަހި ކުރުމާއި ގުޅޭގޮތުން މަޝްވަރާކުރައްވާފައެވެ.
މި ބައްދަލުކުރެއްވުމުގައި، މރ. އަކަހޯޝީއާގެ އަރިހުގައި ޖެޓްރޯގެ ނައިބު ރައީސް، މރ. ނަޔޯޝީ ނޮގޫޗީ ވެސް ބައިވެރިވެވަޑައިގެންނެވިއެވެ. އަދި މިނިސްޓަރ ޝާހިދުގެ އަރިހުގައި ޖަޕާނަށް ޒިޔާރަތް ކުރައްވަމުން ގެންދަވާ ދިވެހި ވަފުދުގެ ބޭފުޅުންވެސް ބައިވެރިވެވަޑައިގެންނެވިއެވެ.
