އެެތެރޭގެ އުދުހުންތަކުގެ އަގުތައް ހެޔޮކޮށް އައު އަގުތައް އަދި އިއުލާން ނުކުރެވި ލަސްވަނީ، މަޝްވަރާ ކޮށްގެން ނިންމަން ޖެހޭ ކަންކަން ހުރުމުން ކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އިން ބުނެފިއެވެ.
ދެ ދުވަހެއްގެ ތެރޭގައި އެތެރޭގެ އުދުހުންތަކުގެ ހެޔޮ އަގުތައް އިއުލާނު ކުރައްވާނެ ކަމަށް މިނިސްޓަރ އައިޝަތު ނަހުލާ މިމަހުގެ 12 ވަނަ ދުވަހު ވިދާޅުވެފައިވީ ނަމަވެސް، މިއަދާއި ހަމައަށް ވެސް އެއަގުތައް އިއުލާނު ނުކޮށް ހުރުމުން "މިއަދުނޫހުން" ކުރި ސުވާލަަށް ޖަވާބު ދެއްވަމުން މިނިސްޓަރގެ ޕީއޭ ޖަޒްލާން މުޙައްމަދު ވިދާޅުވީ، އަގުތައް އިއުލާނު ނުކުރެވި ލަސްވަނީ، މަޝްވަރާ ކޮށްގެން ނިންމަން ޖެހޭ ކަންތައްތަކެއް ހުރުމާއެކު ކަމަށެވެ. އަދި މިހާރު މަޝްވަރާތައް ނިމިފައިވާ ކަމަށާއި ދެން އޮތީ "ފައިނަލް" ކުރުން ކަމަށް ވެސް ޖަޒްލާން ވިދާޅުވެފައިވެއެވެ.
މީގެއިތުރުން ޖަޒްލާން ވިދާޅުވީ، މިކަމުން އައިލެންޑް އޭވިއޭޝަން އަށް ވެސް ގެއްލުންތަކެއް ކުރިމަތިވާނެތީ ރައީސް އޮފީހާއި ފިނޭންސް މިނިސްޓްރީ ވެސް ހިމެނޭ ކަމަށްވާތީ، ފުރިހަމަ މަޝްވަރާއެއް ނުނިމެނީސް އަދި ވަކި ގޮތަކަށް އިއުލާން ނުކުރެވި ހުރީ ކަމަށެވެ.
"ކުރިން ވެސް މަޝްވަރާތަކެއް ކޮށްފަ މިނިސްޓަރ އެދުވަހު އެފަދައިން (ދެ ދުވަސް ތެރޭގައި އަގުތައް އިއުލާން ކުރައްވާނެ ކަމަށް) ވިދާޅުވީ. ނަމަވެސް އެދުވަސްކޮޅު ރައީސް އިބްރާހިމް މުޙައްމަދު ޞާލިޙު ވެސް ރާއްޖެއިން ބޭރަށް ފުރާވަޑައިގަތް ދުވަސްކޮޅަކާއި ދިމާވެފައި، މިހާރު ރައީސް އެނބުރި އައުމުން އެމަނިކުފާނާއި މަޝްވަރާ ކޮށްފަ ފައިނަލް ކުރާނީ. އެދުވަހުގެ ޕްރެސްގައި ވެސް މިނިސްޓަރ ވިދާޅުވި ރައީސް އޮފީހަށް އެކަން ހުށަހަޅާފައިވާ ކަމަށް" ޖަޒްލާން ވިދާޅުވިއެވެ.
ޖަޒްލާން ވިދާޅުވީ، އެތެރޭގެ އުދުހުންތަކުގެ ހެޔޮ އަގުތައް އިއުލާން ކުރައްވާނެ ސީދާ ދުވަހެއް އަދި ބުނަން ނޭނގޭ ކަމަށާއި ނަމަވެސް މިމަހުގެ 31 ގެ ކުރިން އެއަގުތައް އިއުލާނު ކުރެއްވުމަށް މިނިސްޓަރ އައިޝަތު ނަހުލާ ވަރަށް ބުރަކޮށް މަސައްކަތް ކުރައްވާ ކަަމަށެވެ.
