ޖަޕާނުން ދިވެހިރާއްޖެއަށް ވެދެމުންދާ އެހީތައް މުސްތަޤުބަލުގައިވެސް ވެދެމުން ގެންދާނެ ކަމުގެ ޔަޤީންކަން ޖަޕާނުން ދީފިއެވެ.
މިކަމަށް ޔަޤީންކަން ދީފައިވަނީ ރާއްޖޭގެ ޚާރިޖީ ވަޒީރުއަބްދުﷲ ޝާހިދު، ޖަޕާނުގެ މިނިސްޓަރ އޮފް އެންވަޔަރަމަންޓް، މރ. ޔޮޝިއާކާ ހަރާޑާ އާއި މިއަދު ޓޯކިއޯގައި ބައްދަލުކުރައްވައި ކުރެއްވި މަޝްވަރާތަކުގައި ޖަޕާނުގެ މިނިސްޓަރ އޮފް އެންވަޔަރަމަންޓް މރ. ހަރާޑާއެވެ.
މިބައްދަލުކުރެއްވުމުގައި ދެ ޤައުމުގެ ވަޒީރުން ވަނީ ކުރިއަށް އޮތް ތަނުގައި ދެ ޤައުމުން ގުޅިގެން މަސައްކަތްކުރެވޭނެ ދާއިރާތަކާއި ގުޅޭގޮތުން ވެސް މަޝްވަރާކުރައްވައިފައެވެ. އެގޮތުން ގޮނޑުދޮށްތައް ޙިމާޔަތް ކުރުމާއި ފެނާއި ނަރުދަމާގެ ނިޒާމުތައް ޤާއިމުކުރުމާ ގުޅޭގޮތުން ވަނީ މަޝްވަރާކުރައްވައިފައެވެ.
ޖަޕާނުގެ މިނިސްޓްރީ އޮފް އެންވަޔަރަމަންޓުގައި ބޭއްވުނު މި ބައްދަލުކުރެއްވުމުގައި ވާހަކަފުޅުދައްކަވަމުން މިނިސްޓަރ ޝާހިދު ވަނީ ބައިނަލްއަޤުވާމީ ފެންވަރުގައި މޫސުމީ ބަދަލުތަކާ ދެކޮޅަށް މަސައްކަތް ކުރުމަށް ޖަޕާނުން އިސްނަގައިގެން ކުރަމުންގެންދާ މަސައްކަތްތައް ފާހަގަކުރައްވައި އެމަސައްކަތްތަކަށް ތައުރީފުކުރައްވާފައެވެ. ހަމައެއާއެކު، ކާރިސާތަކުން ލިބޭ ގެއްލުން ކުޑަކުރުމަށާއި ކާރިސާތަކުން އަރައިގަތުމުގެ ޤާބިލުކަން ދިވެހިރާއްޖޭގައި އިތުރުކުރުމަށް ޖަޕާނުގެ ސަރުކާރުން ވެދެއްވާފައިވާ އެހީތައް ފާހަގަކުރައްވައި މިނިސްޓަރ ޝާހިދު ވަނީ ޖަޕާނުގެ ސަރުކާރަށް ޝުކުރުއަދާކުރައްވައިފައެވެ.
މިނިސްޓަރ ޝާހިދުގެ މި ބައްދަލުކުރެއްވުމަކީ އެމަނިކުފާނު 19 އިން 24 ޑިސެމްބަރަށް ޖަޕާނުގެ ވެރިރަށް ޓޯކިއޯއަށް ކުރައްވަމުންގެންދަވާ ރަސްމީދަތުރުފުޅުގެ ތެރެއިން ބޭއްވެވި ބައްދަލުކުރެއްވުމެކެވެ. މި ދަތުރުފުޅުގައި އެމަނިކުފާނުގެ އަރިހުގައި މިނިސްޓަރ އޮފް ފިނޭންސް، އަލްފާޟިލް އިބްރާހީމް އަމީރާއި މިނިސްޓަރ އޮފް އިކޮނޮމިކް ޑިވެލޮޕްމަންޓް، އަލްއުސްތާޛް ފައްޔާޟް އިސްމާޢީލާއި މިނިސްޓްރީ އޮފް ފޮރިން އެފެއާޒްގެ ސްޓޭޓް މިނިސްޓަރ، އަލްފާޟިލް އަޙްމަދު ޚަލީލާއި މިނިސްޓްރީ އޮފް ފޮރިން އެފެއާޒްގެ ބައެއް އިސް ބޭފުޅުން ބައިވެރިވެވަޑައިގަންނަވައެވެ.
