ރައީސް އިބްރާހިމް މުޙައްމަދު ޞާލިޙުގެ ސަރުކާރުންވީ ފުރަތަމަ 100 ދުވަހުގެ ވައުދު ތަކުގެ ތެރެއިން ފަސް ވައުދެއް ފުރިހަމަ ކޮށްފި ކަމަށް އެޓާނީ ޖެނެރަލް އޮފީހުން ބުނެފިއެވެ.
ވައުދުތަކުގެ ތެރެއިން، އެއޮފީހާއި ހަވާލުކޮށްފައިވގަނީ 12 ވައުދެކެވެ.
ވައުދުތައް ފުއްދިފައިވާ މިންވަރާ ބެހޭގޮތުން އޭޖީ އޮފީހުން ނެރުނު ބަޔާނެއްގައި ބުނެފައިވަނީ މިހާތަނަށް ފަސް ވައުދެއް ފުރިހަމަ ވެފައިވާ ކަމަށާއި އެވައުދުތަކަކީ ވަކި ބަޔަކަށް އަމާޒު ކޮށްގެން ހަދާފައިވާ ގާނޫނުތައް މުރާޖައާ ކުރަން ފެށުމާއި ދައުލަތަށް ގެއްލުންވާ ގޮތަށް ނަގާފައިވާ ލޯނުތަކާއި އެއްބަސްވުންތައް ރީ ނެގޯޝިއޭޓް ކުރަން ފެށުމާއި ރިޝްވަތު ހިފާ މީހާއާ އެއްވަރަށް ރިޝްވަތު ދޭ މީހާ ވެސް ކުށްވެރިވާ ގޮތަށް ގާނޫނުލް އުގޫބާތަށް އިސްލާހު ގެންނަން ހުށަހެޅުން ކަމަށެވެ.
މީގެ އިތުރުން، ކޮރަޕްޝަން ފަޅާ އަރުވައިލާ މީހުންނަށް ހިމާޔަތް ދިނުމާ ބެހޭ ބިލެއް ރައްޔިތުންގެ މަޖިލީހަށް ހުށަހެޅުމުގެ އިތުރުން ނުހައްގު މުއްސަނދިކަން ހުއްޓުވުމާ ބެހޭ ބިލެއް މަޖިލީހަށް ހުށަހެޅުމުގެ ވައުދު ވެސް ފުރިހަމަ ކޮށްފައިވާނޭ ކަމަށް އޭޖީ އޮފީހުން ނެރުނު ބަޔާނުގައިވެ އެވެ.
