ރާއްޖޭގެ ބިމުން ކައިވަތެއްވެސް އަސްކަރީ ބޭނުމަކަށް އެއްވެސް ޤައުމަކަށް ދޭން ސަރުކާރުން އެއްބަސްވެފައި ނުވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ދެއްވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ ރާއްޖޭގެ މިނިވަންކަމާއި އިސްތިޤްލާލަށް ކިތަންމެ ކުޑަ ނަމަވެސް ގެއްލުމެއް ލިބިދާނެ ފަދަ އެއްވެސް ކަމެއްގައި އެއްވެސް ޤައުމަކާއިއެކު ރާއްޖެއިން އެއްބަސްވެފައި ނުވާނެ ކަމަށެވެ.
"އަޅުގަނޑު ޤަބޫލުކުރަން އެފަދަ އެއްބަސްވުމެއް ރައީސް ޔާމީނުގެ ވެރިކަމުގައިވެސް ވެފައި ނުއޮންނާނެ ކަމަށް. ނަމަވެސް ރައީސް ޔާމީނު ޝައިނާގެ ވެރިރަށް ބީޖިންގައި ސޮއިކުރެއވި ބޮބޮޑު އެއްބަސްވުން އަދިއެއް ނުފެނޭ. އެވެސް ހޯދަމުން މިގެންދަނީ. އެ އެއްބަސްވުން ފެނުނީމަ ޔަޤީން ކުރެވޭނީ." ރައީސް ޞާލިޙް ވިދާޅުވިއެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ އިންޑިއާގެ 2 ހެލިކޮޕްޓަރު ރާއްޖޭގައި އޮތް ނަމަވެސް އަދި ދުއްވަން އިންޑިއާ ޕައިލެޓުން ތިބި ނަމަވެސް އުދުހޭނީ ރާއްޖެއިން ބޭނުންވުމުން ބޭނުންވި ކަމަކަށް ބޭނުންވި ވަގުތަކު ކަމަށެވެ. އަދި އެކަމަށް ހިނގާ ހުރިހާ ޚަރަދެއް އިންޑިއާ އިން ކޮށްދޭ ކަމަށާއި އެއި ރާއްޖެއަށް ލިބޭ ވަރަށް ބޮޑު ލުޔެއް ކަމަށެވެ.
