ޕޭޕަރ ކުންފުނިތަކަށް ވެސް ރައީސް ޔާމީނުގެ ވެރިކަމުގައި ވަނީ ދައުލަތުގެ ގަރަންޓީ (ސޮވްރިން ގަރަންޓީ) ދީފައި ކަމަށާއި އެއިގެ ތެރެއިން ބައެއް ކުންފުނިތަކުގެ ވެރިން މިހާރުވެސް ނުފެންނަ ކަމަށާއި މިފަދަ ހާލަތުގައި ދަރަނި އެޅޭނީ ރައްޔިތުންގެ ބޮލުގައި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ދެއްވަމުން ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ އެންމެ ބޮޑު އެއް މައްސަލައަކީ ރައީސް ޔާމީނުގެ ވެރިކަމުގައި ދީފައި ހުރި ސޮވްރިން ގަރަންޓީތައް ކަމަށެވެ. "އެވެސް ނުދެއްކުނީމާ އެންމެފަހުން އައިސް ބޮލުގަ މިއެޅެނީ ދައުލަތުގެ. ރައްޔިތުންގެ ބޮލުގަ. ކިހާ ބޮޑު ގެއްލުމެއްތޯ މިއީ!"
ރައީސް އިބްރާހީމް މުޙައްމަދު ޞާލިޙް ވިދާޅުވީ ސޮވްރިން ގަރަންޓީ ދޫކޮށްފައިވާ ފުރިހަމަ އަދަދު އަދިވެސް ސާފުނުކުރެވޭ ކަމަށާއި މިހާރު ފެންނަން ހުރި އަދަދުތަކަށް ބެލި ނަމަވެސް 3.6 ބިލިއަން، 4 ބިލިއަނަށް އަރާ ކަމަށެވެ.
"ޕްރޮޖެކްޓްތައް އެހެރީ ބައެއް މީހުންގެ އަތުން ފައިސާ ނަގައިފަ. ފައުންޑޭޝަން އެކަނި އަޅާފަ ހުރި ތަންތަން އެބަހުރި. ކުންފުނީގެ އޯނަރު ވީތަނެއް ނޭނގެ. ޕޭޕަރު ކުންފުނިތަކަށް ދައުލަތުގެ ސޮވްރިން ގަރަންޓީ ދީފަ ހުރިއިރު ޗެއާމަނާ މެނޭޖިންގ ޑިރެކްޓަރު ހޯދާ ނުފެނިގެން މިއުޅެންޖެހެނީ."
އަޅުގަނޑު ކުރިންވެސް ދައްކަމުން އައީ ބޮޑﷲެތި އިންޓްރެސްޓް ރޭޓުގަ ލޯނު ނަގައި ކުރުމުއްދަތެއްގަ ދައްކަން ޖެހުމުން ލިބޭނެ ގެއްލުމުގެ ވާހަކަ. އެގޮތަށް ލޯނު ނެގީމާ އަނބުރާ ދައްކަން ބުރަވާނެ ވާހަކަ. 6% ގަ ނަގާފަ 5،6 އަހަރުން ދައްކަން ޖެހުނީމާ ނުދެއްކޭނެ ވާހަކަ. އަޅުގަނޑުމެން އިންޑިއާއިން ލޯނު މިނަގަނީ ވަރަށް ކުޑަ އިންޓަރެސްޓް ރޭޓެއްގަ ފުދޫވަރެއްގެ ދިގު މުއްދަތަކުން ދައްކާ ގޮތަކަށް. އަދި ރަނގަޅު މުއްދަތެއްގެ ގްރޭސް ޕީރިއަޑެއްވެސް ލައިގެން." ރައީސް އިބްރާހީމް މުޙައްމަދު ޞާލިޙް ވިދާޅުވިއެވެ.
