އިންޑިއާއަށް ކުރެއްވި ފުރަމާނަ ދަތުރުފުޅުގެ ތެރެއިން ވިސާގެ އެއްބަސްވުން ފިޔަވައި އިންޑިއާއަށް ފައިދާއެއް ކުރާނެ އެއްވެސް އެއްބަސްވުމެއްގައި ސޮއި ކުރައްވާފައި ނުވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސުލްޖުމްހޫރިއްޔާގެ އޮފީހުގައި ނޫސްވެރިންނަށް މައުލޫމާތު ދެއްވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ ވިސާ އެއްބަސްވުމަކީ ރާއްޖެއަށްވެސް ވަރަށް ގިނަ ލުއި ފަސޭހަތައް ލިބޭ ގޮތަށް ވެފައިވާ އެއްބަސްވުމެއް ކަމަށެވެ. ހަމައެޢާއެކު އިންޑިއާ ރައްޔިތުންނަށް ކުރިމަތިވަމުން އަި ދަތިތައްވެސް މިއެއްބަސްވުމުގެ ސަބަބުން ޙައްލުކުރެވިގެންދާނެ ކަމަށެވެ.
އެއްބަސްވުމުގެ ސަބަބުން ދިވެހިންނަށް ލިބިގެންދާނެ ބައެއް ލުއިފަސޭހަތައްވެސް ރައީސް ވަނީ ހާމަކޮށްދެއްވައިފައެވެ.
ވިސާ އެއްބަސްވުމާއިބެހޭ ގޮތުން ފޮރިން މިނިސްޓަރު އަބްދުﷲ ޝާހިދު މިހާރު ނޫހަށް މައުލުމާތު ދެއްވަމުން ވިދާޅުވެފައިވަނީ މިއީ އިންޑިއާއިން އެއްވެސް ގައުމަކާ ދެމެދު ކުރެވޭނެ އެންމެ މިނިވަން އަދި އެންމެ ދީލަތި ވިސާ އެއްބަސްވުން ކަމަށެވެ. އަދި މިއީ ދިވެހިންނަށް މިހައިތަނަށް އިންޑިއާގެ ފަރާތުން ލިބޭ ވިސާގެ އެންމެ ބޮޑު ލުއިކަމަށެވެ.
އާ ވިސާ އެއްބަސްވުމާ އެކު ދިވެހިންނަށް ލިބޭނެ ފައިދާތަކުގެ ތެރޭގައި ޓޫރިޒަމާއި ބޭސްފަރުވާ އާއި ވިޔަފާރިއާއި ގުޅޭ މަސައްކަތްތައް ކުރުމަށްޓަކައި ކޮންމެ ހަ މަހަކުން 90 ދުވަހުގެ ވިސާ ލިބޭނެއެވެ. އަދި ޓޫރިސްޓު ވިސާގައި އިންޑިއާއަށް އެތެރެވުމަށް ފަހު، ކުރިމަތިވާ ސިއްހީ ކުއްލި ކަމަކާއި ގުޅިގެން ގިނަ ދުވަސްތަކެއް ވަންދެން އެ ގައުމުގައި މަޑުކުރަން ޖެހިއްޖެ ނަމަ، ރާއްޖެ ނައިސް މެޑިކަލް ވިސާ ހަމަޖެހޭނެ ކަމަށާއި އެ ހާލަތުގައި އެހީތެރިންނަށް ވެސް މެޑިކަލް ވިސާ ލިބޭނެ ކަމަށެވެ.
މީގެ އިތުރުން ދިގު މުއްދަތަކަށް ބޭސްފަރުވާ ކުރަން ޖެހޭ މީހުން އެންމެ ގިނަ ވެގެން ހަ މަސް، ނުވަތަ ހާލަތަށް ބަލައި އެއް އަހަރާ ހަމައަށް އިންޑިއާގައި ހުންނަ ރާއްޖޭގެ އެމްބަސީން ވިސާ ދޫކުރާނެ ކަމަށާއި އެފަދަ ހާލަތެއްގައި ވިސާ ދޫކުރާނީ ދެ އެހީތެރިންނާއިއެކުގައި ކަމަށްވެސް ޝާހިދު ވަނީ ވިދާޅުވެފައެވެ.
ޝާހިދު ވިދާޅުވެފައިވަނީ އިންޑިއާގައި ކިޔަވަން ހުންނަ މުއްދަތަށް ނަމަ، މަލްޓިޕަލް އެންޓްރީ ސްޓޫޑަންޓް ވިސާ ދޫކުރާނެ ކަމަށެވެ. އަދި އުމުރުން 18 އަހަރުން ދަށުގެ ދަރިވަރުންގެ ބެލެނިވެރިންނަށް، އެ ދަރިވަރެއްގެ ވިސާގެ މުއްދަތަށް މަލްޓިޕަލް އެންޓްރީ ވިސާ ލިބޭނެ ކަމަށެވެ.
މީގެ އިތުރުން މަތީ ތައުލީމަށް ކިޔަވަން ނުވަތަ އެކި ކަންކަމާ ގުޅޭ ރިސާޗް ހެދުމަށްޓަކައި އިންޑިއާގައި ތިބޭ ދަރިވަރުންގެ ކުދިން (18 އަހަރުން ދަށް ނަމަ) އަނބިންނާއި ފިރިން އަދި މައިންބަފައިންނަށް ވެސް ވިސާ ހަމަޖައްސައި ދޭނެ ކަމަށްވެސް ޝާހިދު ވަނީ ވިދާޅުވެފައެވެ. އަދި އިންޑިއާގައި ކިޔަވަން ތިބޭ ދަރިވަރުންގެ ބެލެނިވެރިންގެ 18 އަހަރުން ދަށުގެ ކުދިންނާއި އުމުރުން ދުވަސްވީ މީހުންގެ ހާލަތަށް ބަލައި އެ މީހުންނަށް ވެސް ވިސާ ލިބޭނެ ކަމަށްވެސް ޝާހިދު ވަނީ ވިދާޅުވެފައެވެ.
