ހަތަރު ލީޑަރުންގެ ބައްދަލުވުމެއް މާދަން ބާއްވައި މަޖިލިސް އިންތިޚާބާއި އަދި މިހާރު މަޝްވަރާކުރަން ހުރި ކަންތައްތަކާއި މެދު މަޝްވަރާ ކުރައްވަން މަސައްކަތްޕުޅު ކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ 2 ކޮމިޝަނުގެ ބިލް ފާސް ނުކުރެވި ޗުއްޓީއަށް މަޖިލިސް ދިއުމުން ހިތާމަކުރައްވާ ކަމަށެވެ. އަދި މަޖިލީހުގެ މަސައްކަތްތަކަށް ޕާޓީތަކާއި މެންބަރުންގެ އެއްބާރުލުން ބޭނުންފުޅުވާ ކަމަށެވެ.
"ނަމަވެސް މަޖިލިސް ޗުއްޓީގައި ޖަލްސާއެއް ބާއްވައި އެކަން ކުރިއަށް ގެންދިއުމުގެ ވިސްނުމެއް ނެތް. މިހާރުވެސް ކޮމިޝަންތަކުންނާއި ކަމާއިބެހޭ މުއައްސަސާތައް މެދުވެރިކޮށް މަސައްކަތްތައް ކުރިއަށް އެބަ ގެންދޭ."
ރައީސް އިބްރާހީމް މުޙައްމަދު ޞާލިޙް މިއަދުވެސް ވިދާޅުވީ އެމަނިކުފާނަށް ވެރިކަމަށް ވަޑައިގެންނެވުނު ގޮތް އަބަދުވެސް ހަނދުމަފުޅުގައި ބަހައްޓަވާނެ ކަމަށާއި ކޯލިޝަނުގެ ގުޅުން ބަދަހިކަމާއިއެކު ކުރިއަށް ގެންދަވާނެ ކަމަށެވެ.
