އިންޑިއާއަށް ޓީބިލް ވިއްކާނީ މާކުޑަ އިންޓަރެސްޓެއްގައި ކަމަށާއި އިންޑިއާ އިން ނަގާ ލޯނުތަކުގެ ސަބަބުން ޤައުމު އެއްވެސް ވަރަކަށް އިތުރަށް ދަރަނިވެރި ނުވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ނޫސްވެރިންނަށް މައުލުމާތު ދެއްވަމުން ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވީ ރައީސް ޔާމީނުގެ ވެރިކަމުގައި ޓީބިލް ނުވަތަ ބޮންޑް ވިއްކާފައިވަނީ 5.6.8 އިންސައްތައިގެ އިންޓަރެސްޓްގައި ކަމަށާއި ނަމަވެސް އިންޑިއާއަށް ވިއްކާނީ އެންމެ 1.5 އިންސައްތައިގެ އިންޓަރެސްޓްގައި ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ 400 މިލިއަން ޑޮލަރުގެ ކަރަންސީ ސްވެޕް އެއްބަސްވުމަކީ ޤައުމުގެ ދަރަނި އެއްވެސް ވަރަކަށް ބޮޑުވާނެ އެއްބަސްވުމެއް ނޫން ކަމަށެވެ. "އެއްބަސްވުމަކީ ދިވެހި ފައިސާ ބަހައްޓާފައި ޑޮލަރު ހޯދުމުގެ އެއްބަސްވުމެއް. އެކަމުގެ ސަބަބުން ރާއްޖޭގެ ފޮރިން ރިޒަރވް ރަނގަޅުވެގެންދާނެ."
ރައީސް އިބްރާހީމް މުޙައްމަދު ޞާލިޙް ވިދާޅުވީ 800 މިލިއަން ޑޮލަރުގެ ލޯނު ފެސިލިޓީ ބޭނުންކުރާނީ ރާއްޖޭގައި ހިންގާ މަޝްރޫޢުތަކަށް ކަމަށާއި މިފަދަ މަޝްރޫޢުތަކަށްވެސް ކުރިމަތިލެވޭނީ ދިވެހި ބައިވެރިންނާއިއެކުގައި ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ އިންވެސްޓްމަންޓް ފޯރަމްގައި ޖީއެމްއާރު ބައިވެރިވީ އިންޑިއާގެ ކުންފުންޏެއްގެ ހައިޞިއްޔަތުން ކަމަށާއި އެއްވެސް އެއްބަސްވުމެއް ޖީއެމްއާރުއާއިއެކު ވެފައި ނުއޮންނާނެ ކަމަށެވެ.
