ރައީސުލް ޖުމްހުރިއްޔާ އިބްރާހިމް މުޙައްމަދު ސޯލިޙު އުފައްދާފައިވާ "ކޮމިޝަން އޮފް ޑިސަޕެއަރެންސް އެންޑް ޑެތްސް" ނުވަތަ ގޮތްނޭނގޭ މަރުތަކާއި ވީނުވީއެއް ނެނގި ގެއްލިފައިވާ މީހުންގެ މައްސަލަތައް ބެލުމުގެ ކޮމިޝަން، ގެ އަމާޒަކީ ހުށަހަޅާފައިވާ މައްސަލަތައް ތިން މަސް ދުވަސް ތެރޭގައި ބަލައި ނިންމާލުން ކަމަށް، އެކޮމިޝަނުން މިއަދު ބުނެފިއެވެ.
އެކޮމިޝަނުން މިއަދު ކޮށްފައިވާ ޓްވީޓެއްގައި ބުނެފައިވަނީ، އެފަދައިން ބަލަމުންދާ މައްސަލަތައް މިމަހުގެ 27 ވަނަ ދުވަހު ހާމަކުރާނެ ކަމަށާއި އެކޮމިޝަންގެ އަމާޒަކީ ހުރިހާ މައްސަލައެއް ވެސް ކުރިއަށް އޮތް ތިން މަސް ދުވަސް ތެރޭގައި ނިންމާލުން ކަމަށެވެ.
މަރާލަފައިވާ މީހުންނާއި ވީނުވީއެއް ނޭނގި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސް ސޯލިޙު އުފެއްދެވި މިކޮމިޝަންގެ ރައީސް އަކީ އަލްއުސްތާޛް ހުސްނުއްސުއޫދެވެ.
އެކޮމިޝަނަށް ހުށަހެޅޭ މައްސަލަތައް ތިން މަސް ތެރޭގައި ނިންމާލުމަށް އަމާޒުކޮށްފައިވާއިރު، އޮންލައިން ނޫހަކަށް ދެއްވި ބަސްދީގަތުމެއްގައި ހުސްނުއްސުއޫދު ވިދާޅުވެފައިވަނީ، ކޮމިޝަނަށް ލިބެންވާ ބާރުތައް ނުލިބި އޮތުމުން މައްސަލަތައް ތަހުގީގުކުރުން ލަސްވެދާނެ ކަމަށެވެ.
ކޮމިޝަނަށް ބާރުތައް ދިނުމަށް ރައްޔިތުންގެ މަޖިލިހަށް ހުށަހެޅުނު ބިލް، ގިނަ މެމްބަރުން ހާޒިރު ނުވުމުގެ ސަބަބުން ވަނީ ފާސް ނުކުރެވިފައެވެ. އަދި ރައްޔިތުންގެ މަޖިލިސް މިހާރު ވަނީ ޗުއްޓީއަށް ގޮސްފައެވެ.
