ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް އިންޑިއާއަށް ކުރެއްވި ދަތުރުފުޅުގެ މައުލޫމާތު ހާމަކުރައްވަން ނިންމަވައިފިއެވެ. މިކަމަށްޓަކައި ބާއްވާ ނޫސްވެރިންގެ ބައްދަލުވުން ތާވަލުކޮށްފައިވަނީ މިއަދު މެންދުރު 2.30 ގައެވެ.
ރައީސް އިބްރާހީމް މުޙައްމަދު ޞާލިޙް އިންޑިއާއަށް ކުރެއްވި ދަތުރުފުޅުގެ ތެރެއިން ވަނީ ގިނަ އެއްބަސްވުންތަކެއްގެ ސޮއިކުރެވިފައެވެ. އެއިގެ ތެރޭގައި 400 މިލިއަން ޑޮލަރުގެ ކަރަންސީ ސްވެޕް އެއްބަސްވުމަކާއި 50 މިލިއަން ޑޮލަރުގެ ހިލޭ އެހީގެ އެއްބަސްވުމަކާއި 150 މިލިއަން ޑޮލަރުގެ ބޮންޑް ވިއްކުމުގެ އެއްބަސްވުމަކާއި ސްރުކާރުން ހިންގާ މަޝްރޫއުތަކަށް އިންޑިއާގެ އެގްޒިމް ބޭންކުން 800 މިލިއަން ޑޮލަރުގެ ލޯނު އެއްބަސްވުމެއް ހިމެނެއެވެ.
މީގެ އިތުރުން 1000 ސްކޯލާޝިޕް ދިނުމުގެ އެއްބަސްވުމަކާއި ވިސާގެ ކަންތައްތަކަށް ލުއިފަސޭހަ ގޮތްތަކެއް ހމަޖެއްސުމުގެ އެއްބަސްވުމެއްގައިވެސް ވަނީ ސޮއިކުރައްވައިފައެވެ.
