"ވެރިކަމުގަ ހުންނެވިއިރު ޤާސިމް ކަމަކު ނުދޭ. ވެރިކަން ގެއްލި ކޮށްފައިވާ ވައްކަމާއި ކޮރަޕްޝަނުގެ މައްސަލަތައް ބޯމަތިވެ ޕާޓީ ގެއްލި ކައިރީގަ ތިބި މީހުންވެސް ދުރަށް ގޮސް އެކަނިވާ ހިސާބަށް ދިއުމުން މިހާރު ތިއަހެން ވިދާޅުވުމުން ހަމަ ތިއަ ވާހަކަ ޤަބޫލުކުރަންވީތޯ؟" ޖޭޕީގެ ޕީޖީ ލީޑަރު، މަޖިލީހުގެ މައިނޯރިޓީ ލީޑަރު ޢަބްދުﷲ ރިޔާޟް ރައީސް ޔާމީނާއި މުޚާޠަބް ކުރައްވައި ވިދާޅުވެފައިވާ ބަސްފުޅެކެވެ.
ޢަބްދުﷲ ރިޔާޟް މިމޭރުމުން ވިދާޅުވީ ނޫސްވެރިންނަށް މައުލޫމާތު ދެއްވަމުން ޖޭޕީގެ ލީޑަރު ޤާސިމް އިބްރާހީމް އަށް ތައްރީފްކުރައްވައި ރައީސް ޔާމީން މިއަދު ވާހަކަފުޅު ދެއްކެވުމުންނެވެ. ރައީސް ޔާމީން މިއަދު ވަނީ ޤާސިމް އިބްރާހީމްގެ ޤާބިލުކަމާއި ހަރުދަނާކަން ފާހަގަކުރައްވައި ތައްރީފްކުރައްވައިފައެވެ. އަދި ޤާސިމް އިބްރާހީމް އާއިއެކު ގުޅިގެން މަސައްކަތް ކުރެއްވިދާނެ ކަމަށް ވެސް ވިދާޅުވެފައެވެ.
ރައީސް ޔާމީން މިއަދު އެމޭރުމުން ކަންކަން ކުރެއްވިއިރު ޤާސިމް އިބްރާހީމްގެ ހަޔާތްޕުޅުގައިވެސް އެންމެ ބޮޑު އަނިޔާއެއް ހުރިހާ ގޮތަކުން ވެސް ދެއްވާފައިވަނީ ރައީސް ޔާމީނެވެ. ޙައްޤު ނޫން އިލްޒާމްތައް އަޅުވައި ޤާސިމް އިބްރާހީމްގެ ވިޔަފާރިތައް ހުއްޓުވަން ކުރެއްވެން އޮތް ހުރިހާ ކަމެއް ވަނީ ކުރައްވައިފައެވެ. ކަނޑައެޅިގެން ދޮގު މައުލޫމާތު ރައްޔިތުންގެ ކުރިމަތީގައި ހާމަކުރައްވައި ފަޟީޙަތް ކުރައްވަން ވަނީ މަސައްކަތް ކުރައްވައިފައެވެ.
އެއްބަސްވުންތަކާއި ޚިލާފަށް އެއްބަސްވުންތައް ބާޠިލުކޮށް މާލީ ގޮތުން ވަނީ ބޮޑެތި ގެއްލުންތައް ދީފައެވެ. މިފަދަ އެތައް ކަމެއްގެ އިތުރުން ވުޖޫދުގައި ނުވެސް ނެތް މައްސަލައެއް އުފައްދުވައި ދަރިކަލުން އިބްރާހީމް ސިޔާދު ޤާސިމް ވަނީ 162 ދުވަހު ޖަލު ބަންދުގައި ގެނގުޅުވައިފައެވެ. ރައީސް ޔާމީނު ވިދާޅުވެފައިވަނީ އެމަނިކުފާނު ވާހަކަފުޅު ދައްކަވަނީ އެނގިހުންނަވައިގެން ކަމަށެވެ.
ނަމަވެސް ކަންކަން އަބަދުވެސް ދިމާވަމުން ދަނީ ވިދާޅުވާ ގޮތާއި މުޅިން ދެކޮޅަށެވެ. ޤާސިމް އިބްރާހީމް ފަދަ ޤައުމީ ޚިދުމަތްތެރިއަކު ލައްވައި ފާޚާނާ ސާފު ނުކުރުވާނެ ކަމަށް ވިދާޅުވި ބަސްފުޅުވެސް ވަނީ ދިމާ އިދިކޮޅަށް ބޭނުންކުރައްވައިފައެވެ. ޖަލުގެ ކުޑަގޮޅީގައި ބަނދުކުރުވައި ވަނީ ފާޚާނާވެސް ސާފުކުރުވައިފައެވެ. ސިޔާސީ މަޝްރަޙު ދިރާސާ ކުރައްވާ ބޭފުޅުން ވިދާޅުވަނީ ރައީސް ޔާމީނު މިއަދު ޤާސިމް އިބްރާހީމްއަށް ތައްރީފް ކުރެއްވީ އަދި މިފަހަރު ޤާސިމްގެ ފުރާނަ މާތް ﷲ ސަލާމަތް ކުރެއްވެވީތީ ކުރިއަށްވުރެ ވަރުގަދަ ހަމަލާތަކެއް ދެއްވައި ފުރާނަވެސް ދުއްވާލަން ބޭނުންފުޅުވާތީ ކަމަށެވެ.
