މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގު ކުރާ ކޮމިޝަނަށް ބާރުތައް ނުލިބި ލަސްވުމާ ގުޅިގެން ތަހުގީގުތައް ލަސްވާނެ ކަމަށް އެ ކޮމިޝަންގެ ރައީސް އަލްއުސްތާޛް ހުސްނުއްސުއޫދު މިއަދު ވިދާޅުވެއްޖެ އެވެ.
އެކޮމިޝަނަށް ބާރު ދިނުމަށް މަޖިލީހަށް ހުށަހަޅާފައިވާ "ދައުލަތުގެ ފައިސާއާއި މުދަލަށް ހިޔާނާތްތެރިވުމުގެ މައްސަލަތަކާއި ގޮތް ނޭނގޭ މަރުގެ މައްސަލަތައް ބެލުމުގެ ބިލް" ކޮމިޓީ މަރުހަލާއިން ދިރާސާ ކުރުމަށް ފަހު ރައްޔިތުންގެ މަޖިލީހުގެ ތަޅުމަށް ވެސް ފޮނުވިއެވެ. ނަމަވެސް އެ ބިލު ފާސް ކުރަން އޮތް ދުވަހު ގިނަ މެމްބަރުން މަޖިލިހަށް ހާޒިރު ނުވުމުގެ ސަަބަބުން، އެކޮމިޝަންގެ ބާރުތައް ލިބުމުގެ ބިލް ވަނީ ފާސް ނުވެފައެވެ. އަދި ބިލު އަދިވެސް އޮތީ މަޖިލީހުގަ އެވެ.
އެކަމާ ގުޅޭ ގޮތުން އޮންލައިން ނޫހެއް ކަމަށްވާ "އަވަސް" އިން ކުރި ސުވާލަކަށް ޖަވާބު ދެއްވަމުން އެކޮމިޝަންގެ ރައީސް ސުއޫދު ވިދާޅުވީ މަޖިލީހުގައި ބިލު ފާސް ނުވުމާ ގުޅިގެން ކޮމިޝަނުން ނެރެން ބޭނުންވި ނަތީޖާ ނެރުމުގައި ލަސްތަކެއް ވާނެ ކަމަށާއި އެ ދުވަހު މަޖިލީހުން ބިލު ފާސް ކުރިނަމަ ތަހުގީގުތައް އަވަސް ކުރުމަށް މަގުފަހިވެ ފަސޭހަ ވެގެންދާނެ ކަމަށެވެ.
ނަމަވެސް އެބިލާއިމެު ވަކި ގޮތެއް އަދި ނުނިމި އޮތުމުގެ ސަބަބުން ބައެއް ތަހުގީގުތައް ލަސްވުން އެކަށީގެންވާ ކަމަށް ވެސް ސުއޫދު ވިދާޅުވި އެވެ.
"މައިގަނޑު ގޮތެއްގައި ދިމާވާނެ މައްސަލައަކީ ތަހުގީގުތައް ލަސްވުން، ބިލު ފާސްވެ ކޮމިޝަނަށް ބާރުތައް ލިބުނު ނަމަ އެ މަރުހަލާ އަވަސް ވާނެ، މިހާރު މަސައްކަތް ކުރުމުގައި ބައެއް ދަތިތައް ހުންނާނެ،" ސުއޫދު ވިދާާޅުވި އެވެ.
