ކުޑަކުއްޖެއްގެ ފުރާނަ ގެއްލުމަށްވުރެ ބޮޑު ހިތާމައެއް ނެތްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
ސިމެންތި ބަސްތާއެއް ވެއްޓި ހިނގި ހިތާމަވެރި ހާދިސާގައި މި ދުނިޔެއާ ވަކިވެގެންދިޔަ، އުމުރުން އަށް އަހަރުގެ ރައުޝަން ޖިއާންގެ މައިންބަފައިންނާއި އާއިލާއަށް ތައުޒިޔާ ވިދާޅުވަމުން ރައީސް ސޯލިހު ކުރެއްވި ޓްވީޓެއްގައި ވިދާޅުވީ ކުޑަކުއްޖެއްގެ ފުރާނަ ގެއްލުމަށްވުރެ ބޮޑު ހިތާމައެއް ނެތްކަމަށާ މި ހިނގާދިޔަ ހިތާމަވެރި ހާދިސާއިން އިބުރަތް ލިބިގަނެ، މިހާރަށްވުރެ ބޮޑަށް ރައްކާތެރިކަމުގެ ފިޔަވަޅުތައް އެޅުމުގައި އަވަސްވެގަތުމަށް ގޮވާލައްވާ ކަމަށެވެ.
އެކުއްޖާ ނިޔާވުމާއި ގުޅިގެން ރައީސް ސޯލިހް ވަނީ އެކުއްޖާގެ އާއިލާއަށް ފޯނުން ގުޅުއްވައި ވެސް ތައުޒިޔާ ދަންނަވާފައެވެ.
މި ހާދިސާ ހިނގުމާއެކު ރައީސުލްޖުމްހޫރިއްޔާ ވަނީ މަސައްކަތްކުރާ ތަންތަނުގެ ސަލާމަތީ ކަންކަން ހުރިނެތްގޮތް ބެލުމަށް އަމުރު ކުރައްވާފަ އެވެ. އަދި މީގެ އިތުރުން އެމަނިކުފާނުވަނީ މި ހާދިސާގައި އަނިޔާވި ކުއްޖާގެ ހާލު ބައްލަވާ، މިފަދަ ހިތާމަވެރި އިތުރު ހާދިސާއަކަށް މަގުފަހި ނުވާނެހެން ކަންކަން އިސްލާހު ކުރެއްވުމަށް އިރުޝާދު ދެއްވާފަ އެވެ.
There is no greater sadness than the passing of a child’s life. My sincere condolences to the parents and family of young Rawshan Jian. May we all learn from this terrible tragedy and resolve to enforce stronger safety measures.
— Ibrahim Mohamed Solih (@ibusolih) December 17, 2018
