އިންޑިއާ އަކީ ރާއްޖޭގެ އެންމެ ގާތް އެކުވެރިޔާ އެކަނި ނޫން ކަމަށާއި އިންޑިއާއަކީ ވިޔަފާރީގެގޮތުން ރާއްޖޭގެ އެންމެ ބޮޑު އެއް ބައިވެރިޔާ ކަމަށް އަދި ރާއްޖެއާ އިންޑިއާގެ ގުޅުން ބަދަހިވެފައިވަނީ ވިޔަފާރީގެ މައްޗަށްކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ރައީސް އިބްރާހީމް މުޙައްމަދު ޞާލިޙް މިމޭރުމުން ވިދާޅުވެފައިވަނީ އިންޑިއާގެ ބޮޑުވަޒީރު ނަރެންދުރަ މޯދީގެ ދަޢުވަތަކަށް އިންޑިޔާއަށް މިހާރު ކުރައްވަމުންގެންދަވާ ފުރާމާނަ ދަތުރުފުޅުގައި އިންޑިޔާގެ ވިޔަފާރިވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ބޭރުގެ ވިޔަފާރިވެރިން ރާއްޖޭގައި އިންވެސްޓްކުރުމަށް ރާއްޖެއިން މަރުޚަބާކިޔާކަމަށާއި، ބޭރުގެ ވިޔަފާރިތަކަށް ރާއްޖެވަނީ ހުޅުވާލެވި، ތައްޔާރަށްކަމަށެވެ. މިބައްދަލުކުރެއްވުމުގައި ވާހަކަފުޅުދައްކަވަމުން ރައީސް އިބްރާހީމް މުޙައްމަދު ޞާލިޙް ވަނީ ރާއްޖޭގައި މިހާރު ހުރި ވިޔަފާރީގެ ފުރުޞަތުތަކާބެހޭ މަޢުލޫމާތު އިންޑިއާގެ ވިޔަފާރިވެރިންނާ ޙިއްޞާކުރައްވާފައެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ ފަންސަވީހަކަށް އަހަރު ކުރިން ކުރަން ފެށި ބުރަ މިންނެތް މަސައްކަތުން އިންޑިއާއިން ކާމިޔާބުކަމާއެކީ ބިނާކޮށްފައިވާ މިނިވަން އިޤްތިޞާދަކީ ތަޢުރީފު ޙައްޤު މަސައްކަތެއްމަށެވެ. އަދި، މިއަދު ރާއްޖެއަކީ ވެސް ހަލުވިކަމާއެކު ތަރައްޤީ ވަމުން އަންނަ އިޤްތިޞާދެއްކަމަށެވެ.
