އަދުގެ ސަރުކާރަކީ ތަރައްޤީއަށްޓަކައި މި ރާއްޖޭގެ ޤުދުރަތީ ވެށި ޤުރްބާންކުރާނެ ބައެއް ނޫންކަމަށާއި، މިސަރުކާރުގެ ތަރައްޤީ، ރައްޔިތުންނާ ބައްދަލުކުރާނީ ތިމާވެށްޓާ އެއްކީލިވާ ގޮތެއްގައިކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ސަރުކާރުގެ ފުރަތަމަ 100 ދުވަހުގެ ވަޢުދުތަކުގެތެރޭގައި ހިމަނައިގެން ކުރިއަށް ގެންދަވާ "ރަށް ފެހި" ގަސް އިންދުމުގެ ޤައުމީ ޕްރޮގްރާމް އިފްތިތާޙުކޮށްދެއްވުމުގެ ގޮތުން ހުޅުމާލެ ފޭސް 2 ގައި ބޭއްވެވި ރަސްމިއްޔާތުގައި ވާހަކަފުޅުދައްކަވަމުންނެވެ.
މިރަސްމިއްޔާތުގައި ވާހަކަފުޅުދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ މިއަދު މިފަށްޓަވާ ޕްރޮގްރާމަކީ، ރާއްޖެއަށް ވަރަށް މުހިންމު އަދި އެހައިމެ ބޭނުންތެރި ޕްރޮގްރާމެއްކަމަށާއި، މުޅި ރާއްޖޭގައި ގަސް އިންދުމުގެ ޕްރޮގްރާމެއް ފެށުމަކީ، މިވެރިކަމުގެ ފުރަތަމަ 30 ދުވަހުގެ ތެރޭގައި ކުރުމަށް ކަނޑައަޅާފައިވާ މުހިންމު އެއް ކަންތައްކަމަށެވެ.
"މިއީ ތިމާވެށި ޙިމާޔަތް ކުރުމުގެ ގޮތުން، ސަރުކާރުގެ ފުރަތަމަ 100 ދުވަހުގެ ތެރޭގައި ފެށުމަށް ނިންމާފައިވާ ކަންތަކުގެ ތެރެއިން، ފުރަތަމަ 30 ދުވަހުގެ ތެރޭގައި ތަންފީޒުކުރެވޭ ދެވަނަ ކަންތައް. މީހުން ދިރިއުޅޭ ހުރިހާ ރަށެއްގައި، ފުރަތަމަ 100 ދުވަހުގެ ތެރޭގައި، ގަސް އިންދަން ފެށުމުގެ ތައްޔާރީތައް އެންވަޔަރްމެންޓް މިނިސްޓްރީން މިހާރު އެ ގެންދަވަނީ ކުރައްވަމުން" ރައީސުލްޖުމްހޫރިއްޔާ ވިދާޅުވިއެވެ.
މި ޕްރޮގްރާމް މި ފަށްޓަވަނީ ރާއްޖޭގެ އެކި ރަށްރަށުން ގިނަ އަދަދަކަށް ރުއްގަސް ކެނޑުމުގެ މައްސަލަތަކެއް ކުރިމަތިވެފައިވާ ދުވަސްވަރެއްގައިކަން ފާހަގަކުރައްވައި ރައީސް ޞާލިޙް ވިދާޅުވީ ގަސް ކެނޑުމާއި ރަށްތައް ހަނަފަސްކުރުމުގެ މައްސަލައަށް ދާއިމީ ޙައްލެއް ގެނެވޭނީ، ތިމާވެއްޓާ ގުޅޭ ޤާނޫނުތައް ފުރިހަމައަށް ތަންފީޒުކޮށްގެންކަމަށެވެ. އަދި ތިމާވެށީގެ ޙިމާޔަތުގައި އުފައްދާފައި ހުރި މުޢައްސަސާތައް، މިހާރަށް ވުރެ ބާރުވެރިކުރުވައި މިނިވަންކަމާއިއެކު މަސައްކަތް ކުރުމުގެ ފުރުސަތު ދީގެންކަމަށެވެ.
"މި ހިނގާ 100 ދުވަހުގެ ތެރޭގައި، އެންވަޔަރްމެންޓަލް ޕްރޮޓެކްޝަން އޭޖެންސީ ބާރުވެރިކުރުވައި، މިނިވަންކަމާ އެކު ހިންގުމުގެ ފުރުސަތު ތަނަވަސްވެގެން ދާނެ. މި ކަމުގެ ފުރަތަމަ ފިޔަވަޅެއްގެ ގޮތުން، އީއައިއޭ ހެދުމުގެ ޒިންމާތައް، ޓޫރިޒަމް މިނިސްޓްރީން ވަކިކޮށް، ތިމާވެއްޓާ ބެހޭ މިނިސްޓްރީއަށް ބަދަލުކުރެވޭނެ" ރައީސް ޞާލިޙް ވިދާޅުވިއެވެ.
ރައީސް ޞާލިޙް ވިދާޅުވީ އެއް ރަށް ފެހި ކުރުމަށްޓަކައި، އަނެއް ރަށް ހަނަފަސްކޮށްލުމަކީ، މި ސަރުކާރުން ޤަބޫލުކުރާ ހަމައެއް ނޫންކަމަށާއި، މިއަދު ހުޅުމާލޭގައި މި އިންދާ 100 ރުކާއި، 150 ގަހަކީ، އެއްވެސް ރަށަކުން ނަގައިގެން ގެނައި ރުއްގަހެއް ނޫންކަމަށެވެ. އަދި، މިއަދު މިއިންދަނީ، ހުޅުމާލޭ ނާސަރީގައި މުޑުވައްކޮށް ހައްދާފައިވާ ރުއްގަސްކަމަށެވެ.
މި ރަސްމިއްޔާތުގައި ރައީސުލްޖުމްހޫރިއްޔާ ވަނީ "ރަށް ފެހި" ގަސް އިންދުމުގެ ޤައުމީ ޕްރޮގްރާމް އިފްތިތާޙުކޮށްދެއްވުމުގެގޮތުން ބޭއްވެވި ގަސް އިންދެވުމުގެ ޙަރަކާތުގައި ޢަމަލީގޮތުން ބައިވެރިވެވަޑައިގެން ގަސް އިންދަވައިފައެވެ.
