ކުރީގެ ރައީސް އަބްދުﷲ ޔާމީން އަބްދުލްޤައްޔޫމްގެ ސަރުކާރުން ދައުލަތް ދަވާލާފައިވާ މިންވަރު ބަޔާންކޮށްދެއްވަމުން، ފޮރެން މިނިސްޓަރ އަބްދުﷲ ޝާހިދު ވިދާޅުވީ، މުވައްޒަފުންނަށް މިހަމު މުސާރަ ދޭނެ މިންވަރުވެސް ޚާޒާނާގައި ނެތް ކަމަށެވެ.
މިނިސްޓާރ މިހެން ވިދާޅުވެފައި ވަނީ، ރައީސް އިބްރާހިމް މުހައްމަދު ޞާލިޙް އިންޑިއާއަށް މާދަމާ ފަށްޓަވާ ރަސްމީ ދަތުރުފުޅާ ގުޅޭ ގޮތުން، އޮންލައިން މީޑިއާ މިހާރުނޫހަށް ދެއްވި އިންޓަވިއުއެއްގައިއެވެ.
އެމަނިކުފާނު ވިދާޅުވީ، ބަޖެޓަށް ގާތްގަނޑަކަށް އިތުރު 200 މިލިއަން ޑޮލަރު ލިބިގެން ނޫނީ ކުރިއަށް ދެވޭނެ ގޮތެއް ނެތް ކަމަށެވެ. އެހެންވެ، އިންޑިއާއިން 200 މިލިއަން ޑޮލަރު ހިލޭ އެހީގެ ގޮތުގައި ލިބޭތޯ ބައްލަވަމުން ގެންދަވާ ކަމަށް މިނިސްޓަރު ވިދާޅުވި ކަމަށް މިހާރުން ރިޕޯޓުކޮށްފައި ވެއެވެ.
އެނގިފައިވާ ގޮތުން، ބަޖެޓް ސަޕޯޓުގެ ގޮތުގައި އެކި ގައުމުތަކުން ދޭ ހިލޭ އެހީ މި މަހު ނުވަތަ އަންނަ މަހު ރާއްޖެއަށް ލިބޭނެ އެވެ.
