ދިވެހިރާއްޖޭގެ ހުރިހާ ރަށެއް، ބެލެހެއްޓުމުގެ ޒިންމާ އިކޮނޮމިކް މިނިސްޓްރީގެ ދަށަށް ބަދަލުކޮށްފި އެވެ.
މިކަމާއި ގުޅިގެން، އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ، އާ ސަރުކާރާ އެކު ރާއްޖޭގެ ރަށްތަކާ ގުޅޭ ހުރިހާ މައުލޫމާތުތަކާއި ރެކޯޑްތައް ބަލަހައްޓަމުން ގެންދާނީ އެ މިނިސްޓްރީން ކަމަށެވެ. ނަމަވެސް މީގެ ކުރިން، މި މައުލޫމާތުތައް ބަލަހައްޓަމުން ގެންގޮސްފައި ވަނީ ފިޝަރީޒް މިނިސްޓްރީންނެވެ.
މިނިސްޓަރު އިތުރަށް ވިދާޅުވީ، އިކޮނޮމިކް މިނިސްޓްރީން ރަށްތައް ބެލެހެއްޓި ނަމަވެސް ޓޫރިޒަމަށް ރަށްތައް ދިނުމުގައި ބިޑް ކުރުމުގެ މަސައްކަތްތަކަށް ކުރާނީ ޓޫރިޒަމް މިނިސްޓްރީން ކަމަށެވެ.
ހަމައެހެންމެ، ރާއްޖޭގެ ރަށްތައް އެކި ބޭނުންތަކަށް ދޫކުރުމުގައި އިކޮނޮމިކް މިނިސްޓްރީން ހަވާލުވެފައިވާ އިރު ކުރިއަށް އޮތްތަނުގައި އެކި ބޭނުންތަކަށް ކައުންސިލްތަކަށް ރަށްތައް ހަވާލު ކުރުމުގެ ވިސްނުން ގެންގުޅުއްވާ ކަމަށްވެސް މިނިސްޓަރު ވިދާޅުވިއެވެ.
