މި ސަރުކާރުގެ ޢައިބުތައް ދެނެގަނެވޭނީ، ނޫސްވެރިންގެ ލޯގަނޑުން މި ސަރުކާރުގެ ފަސްބައި ބެލިވަރަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ދިވެހި ނޫސްވެރިކަމުގެ އަލިމަސް ޔޫބީލް ފާހަގަކުރަން ރޭ ދަރުބާރުގޭގައި ބޭއްވި ރަސްމިއްޔާތުގައި ރައީސް އިބްރާހީމް މުޙައްމަދު ޞާލިޙް ވިދާޅުވީ ދުނިޔޭގެ ވަރަށް ގިނަ ޤައުމުތަކުގައި މިނިވަން ނޫސްވެރިކަމަކީ، ސަރުކާރުތަކަށް ކުރިމަތިވެފައި އޮންނަ އެންމެ ބޮޑު ބިރު ކަމަށެވެ.
"ޤައުމީ މަޞްލަޙަތު ގެއްލުވައިލިޔަސް، ކޮރަޕްޝަނާއި ފަސާދައިގެ ކިތަންމެ ބޮޑު ޖަރީމާއެއް ހިންގިޔަސް، ނޫސްވެރިން އެކަންކަން ރިޕޯޓް ކުރުމަކީ ސަރުކާރުތައް ހިތްހަމަޖެހޭ ކަމެއްނޫން. މި ރާއްޖޭގައިވެސް ކަން ހިނގައިދިއައީ ހަމަ އެގޮތަށް." ރައީސް އިބްރާހީމް މުޙައްމަދު ޞާލިޙް ވިދާޅުވީ އެމަނިކުފާނު މިއަދު ބޭނުންފުޅުވަނީ، އެ ޘަޤާފަތް ދޫކޮށްލައްވަން ކަމަށެވެ. އަދި ރައްޔިތުންވެސް ބޭނުންވަނީ ހަމަ އެގޮތް ކަމަށެވެ.
"ނޫސްވެރިންނަކީ އަދި ނޫސްވެރިންނަކީ އަދި ނޫސްވެރިން ފާޅުކުރާ ޚިޔާލުތަކާއި ފާޑުކިޔުންތަކަކީ، ސަރުކާރަށް އޮތް ނުރައްކަލެއް ކަމުގައި އަޅުގަނޑު ހަމަގައިމުވެސް ނުދެކެން. ނޫސްވެރިންގެ ފާޑުކިޔުންތަކަކީމި ސަރުކާރުގެ ދިރުން. މި ސަރުކާރުގެ ޢައިބުތައް ދެނެގަނެވޭނީ، ނޫސްވެރިންގެ ލޯގަނޑުން މި ސަރުކާރުގެ ފަސްބައި ބެލިވަރަކުން. އެކަމަށް މި ސަރުކާރު އިޖާބަ ދޭނަން.
" ރައީސް އިބްރާހީމް މުޙައްމަދު ޞާލިޙް ވިދާޅުވީ އެމަނިކުފަނު ޤަބޫލުފުޅުކުރައްވަވާ ގޮތުގައި ދައުލަތް ހަމަ މަގުން ހިނގުމަށް އެދޭނަމަ، ސަރުކާރުގެ ހުރިހާ މުއައްސަސާތަކުންވެސް މިނިވަން ނޫސްވެރިކަމަށް ޖާގަ ދޭންޖެހެއެވެ.
މިނިވަން ނޫސްވެރިކަމުން ސަރުކާރަށް އުނދަގޫތަކެއް ކުރިމަތިވާކަމަށް އިޙްސާސް ކުރެވޭނަމަ، އެކަމުގެ ހަމައެކަނި ޙައްލަކީ، ލޯމަރާލާފައި ނަމަވެސް، ނޫސްވެރިކަމަށް އިތުރު މިނިވަންކަން ދިނުން ކަމަށެވެ. "މިނިވަން ނޫސްވެރިކަމަކީ ޚިޔާލުފާޅުކުރުމުގެ މިނިވަންކަމުގެ އެއް އަސާސް.އެ ޙަޤީޤަތް ޤަބޫލުކުރާ ޙާލު، އަޅުގަނޑުމެން ވެރިކަމާ ޙަވާލުވީ، ސަރުކާރުގެ ނުފޫޒުން އެއްކިބާވެފައިވާ މިނިވަން މީޑިއާއެއް ޤާއިމުކޮށްދިނުމުގެ ވަޢުދާއެކު. މަޢުލޫމާތު ހޯދައި ލިބިގަތުމުގެ ފަހި މާޙައުލެއް ތަނަވަސްކޮށްދީ، މިނިވަންކަމާއެކު ޚިޔާލުފާޅުކުރެވޭނެ ވެށްޓެއް، މި ސަރުކާރުން ނޫސްވެރިންނަށް ޤާއިމުކޮށްދޭނެ."
