މާލޭ ސަރަހައްދުގައި ޤަވާއިދާ ޚިލާފަށް އުޅޭ ބިދޭސީން ހޯދުމަށް އިމިގްރޭޝަން ޓާސްކް ފޯސްއިން އިއްޔެ ހިންގި ހާއްސަ ރެއިޑް އޮޕަރޭޝަނެއްގައި، ޤަވާއިދާ ޚިލާފަށް އުޅެމުންދިޔަ 13 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން މައުލޫމާތު ދެއްވި ގޮތުގައި، ވެރިރަށް މާލޭގެ އެކި ސަރަހައްދުތައް ކަވަރުވާނޭހެން އިއްޔެ ކުރިއަށް ގެންދިޔަ މި އޮޕަރޭޝަނުގެ ތެރެއިން ޖުމްލަ 426 ބިދޭސީއަކު ވަނީ ބަލައި ފާސްކޮށްފައެވެ. އަދި މި ބަލައި ފާސްކުރުންތަކުގެ ތެރެއިން އިމިގްރޭޝަނުގެ ބެލުމުގެ ދަށަށް ގެންގޮސްފައިވަނީ، ރާއްޖޭގައި މަސައްކަތް ކުރުމަށް ހެދިފައިވާ ޤަވާއިދުތަކާ ޚިލާފަށް އުޅެމުންދިޔަ 13 މީހެކެވެ.
ރާއްޖޭގައި ޤަވާއިދާ ޚިލާފަށް ދިރިއުޅޭ އަދި މަސައްކަތްކުރާ ބިދޭސީންގެ މައްސަލައަކީ ޤައުމީ ފެންވަރުގައި ބޮޑުވެފައިވާ މައްސަލައަކަށްވާއިރު، މި މައްސަލަ ހައްލުކުރުމަށްޓަކައި ސަރުކާރުން ވަނީ ހާއްސަ އިސްކަމެއް ދީފައެވެ. އެގޮތުން، އިމިގްރޭޝަނާއި ދިވެހި ފުލުހުންގެ ޚިދުމަތް ގުޅިގެން މާލޭ ސަރަހައްދުގެ އިތުރުން ރާއްޖޭގެ އެކި އަތޮޅުތަކުގައި ވެސް މިފަދަ ހާއްސަ އިންސްޕެކްޝަންތަކާއި ރެއިޑް އޮޕަރޭޝަންތައް ސިލްސިލާކޮށް ދަނީ ކުރިއަށް ގެންދަމުންނެވެ.
އިމިގްރޭޝަނުން ހާމަކުރާ ގޮތުގައި މި އޮޕަރޭޝަންތަކުގެ މައިގަނޑު މަޤްޞަދަކީ ޤަވާއިދާ ޚިލާފަށް އުޅޭ ބިދޭސީން މަދުކޮށް، އެފަދަ ފަރާތްތަކާމެދު ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމެވެ. އަދި ޤަވާއިދުގެ ތެރެއަށް ނުފެތޭ މީހުން އަނބުރާ ޤައުމަށް ފޮނުވާލުމުގެ މަސައްކަތް ވެސް މި އޮޕަރޭޝަންތަކުގެ ދަށުން ދަނީ ކުރަމުންނެވެ.
