މިދިޔަ މަހު ޕެންޝަންގެ އެކި ސްކީމްތަކާއި ޢިނާޔަތްތަކުގެ ގޮތުގައި ޖުމްލަ 173.36 މިލިޔަން ރުފިޔާ ދޫކޮށްފައިވާ ކަމަށް ޕެންޝަން އޮފީހުގެ ތަފާސްހިސާބުތަކުން ދައްކައިފިއެވެ. ރާއްޖޭގައި ޕެންޝަންގެ ގޮތުގައި އެންމެ ގިނަ ފައިސާ ދޫކުރެވެނީ ދައުލަތުން ޚަރަދުކޮށްގެން ދޭ އަސާސީ ޕެންޝަނަށެވެ.
ދިވެހިރާއްޖޭގެ ޕެންޝަން ނިޒާމު މައިގަނޑު ގޮތެއްގައި ބިނާވެފައިވަނީ ރިޓަޔަރމަންޓަށް ފައިސާ ރައްކާކުރުމުގެ ފުރުޞަތު ފަހިކޮށްދޭ މޯލްޑިވްސް ރިޓަޔަރމަންޓް ޕެންޝަން ސްކީމް (އެމްއާރްޕީއެސް) އާއި އަސާސީ ޕެންޝަންގެ މައްޗަށެވެ. މީގެ އިތުރުން، ދައުލަތަށް ދިގު މުއްދަތަކަށް ޚިދުމަތްކޮށްފައިވާ ފަރާތްތަކަށް ދެވޭ ޢިނާޔަތްތަކާއި އެހެނިހެން ރިޓަޔަރމަންޓް ބެނެފިޓްތައް ދޫކުރުމުގެ އެންމެހައި އިންތިޒާމުތައް ވެސް ކުރިއަށްގެންދަނީ ޕެންޝަން އޮފީހުގެ ބެލުމުގެ ދަށުންނެވެ.
ދޮށީ ޢުމުރުގެ ރައްޔިތުންނަށް އެކަށީގެންވާ އަސާސީ އާމްދަނީއެއް ކަށަވަރުކޮށްދީ، ފަޤީރުކަމުން ރައްކާތެރިކުރުމަށްޓަކައި ދައުލަތުން ފޯރުކޮށްދޭ އިޖުތިމާޢީ ރައްކާތެރިކަމުގެ ޢިނާޔަތެއްގެ ގޮތުގައި، މިދިޔަ އޮގަސްޓް މަހު އަސާސީ ޕެންޝަންގެ ގޮތުގައި 127.91 މިލިޔަން ރުފިޔާ ވަނީ ޚަރަދުކޮށްފައެވެ. މި ޢިނާޔަތް ޖުމްލަ 27,196 ފަރާތަކަށް ލިބިފައިވެއެވެ.
ދައުލަތުގެ މުއައްސަސާތަކުގައި 20 އަހަރާއި 40 އަހަރުގެ މުއްދަތަށް ޚިދުމަތްކޮށްފައިވާ 2,216 ފަރާތަކަށް، ދިގުމުއްދަތުގެ ޚިދުމަތުގެ ޕެންޝަންގެ ގޮތުގައި އޮގަސްޓް މަހު 4.33 މިލިޔަން ރުފިޔާ ވަނީ ދޫކޮށްފައެވެ. އަދި ދައުލަތުގެ މުއައްސަސާތަކާއި ޔުނިފޯމް އެޅި ޚިދުމަތްތަކުން ވަކިވެފައިވާ 4,861 މުވައްޒަފަކަށް، ދައުލަތުގެ އެހެނިހެން ޕެންޝަންގެ ގޮތުގައި 26.73 މިލިޔަން ރުފިޔާ ޚަރަދުކޮށްފައިވެއެވެ.
މުވައްޒަފުންނާއި ވަޒީފާދޭ ފަރާތްތަކުން ޖަމާކުރާ ކޮންޓްރިބިއުޝަންގެ މައްޗަށް ބިނާވެފައިވާ މޯލްޑިވްސް ރިޓަޔަރމަންޓް ޕެންޝަން ސްކީމް (އެމްއާރްޕީއެސް) މެދުވެރިކޮށް، 2,749 ފަރާތަކަށް މަހަކު ގާތްގަނޑަކަށް 14.39 މިލިޔަން ރުފިޔާ ދޫކުރެވެއެވެ. މި ސްކީމަކީ ވަޒީފާ އަދާކުރާ މުއްދަތުގައި ފައިސާ ރައްކާކޮށް، ރިޓަޔަރވުމަށްފަހު އާމްދަނީއެއް ހޯދުމުގެ ފުރުޞަތު ފަހިކޮށްދިނުމަށް އެކުލަވާލާފައިވާ ނިޒާމެކެވެ.
