ﷲ ތަޢާލާ އެމީހަކަށް ރުހިވޮޑިގެންފިކަން ޔަޤީންކުރެވޭނެ އެއްވެސް ގޮތެއް މިދުނިޔޭގައި ތިބޭއިރު ނެތް ނަމަވެސް ﷲ ތަޢާލާ އެމީހަކަށް ރުހިވޮޑިގެންފިނަމަ އެމީހެއްގެ ކިބައިން ފެނިގެންދާނެ ބައެއް ޢަލާމާތްތަކުގެ ތެރެއިން ދެވަނަ ޢަލާމާތަކީ ﷲ ތަޢާލާގެ ރުހިވޮޑިގަތުން ލިބުމަށް އެދެމެވެ. އެމީހަކީ ﷲ ތަޢާލާއަށް ރުހިގެންހުރި މީހަކު ކަމުގައިވުމެވެ.
އެގޮތުން އެފަދަ މީހުން އަބަދުވެސް ﷲ ތަޢާލާގެ ރުހިވޮޑިގަތުމަށް އަބަދުވެސް އެދޭނެއެވެ. ތިމާއަކީ ﷲ ތަޢާލާ ރުހިވޮޑިގަންނަވާ އަޅަކުކަމުގައި ލެއްވެވުން އެދި ދުޢާކުރެވޭނެއެވެ.
އިމާމް ޙަސަބުލްބަޞަރީ ޙަރަމްފުޅުގެ އަރިހުން ދަނިކޮށް މީހަކު އޭނާއަށް ރުއްސެވުން އެދި ދުޢާކުރާއަޑު އިވުމުން ސުވާލުކުރެއްވެވިއެވެ. "ތިބާ ތިއަހުރީ ﷲ ތަޢާލާއަށް ރުހިގެންހެއްޔެވެ؟" އޭނާ ދެންނެވިއެވެ. "މިއަޅާ ﷲ ތަޢާލާއަށް ރުހޭނީ ކިހިނަކުންތޯއެވެ؟"
ﷲ ތަޢާލާއަށް ރުހުމަކީ މިންވަރުފުޅަށް ރުހުމެވެ. އުފާވެރި ޙާލަތުގައާއި ދަތި އުނދަގޫ ޙާލަތުގައިވެސް އެއްވެސް ޝަކުވާއެއް ނުކޮށްހުރުމެވެ. މިއީ ﷲ ތަޢާލާގެ ރަޙްމަތް ކަމަށް ޤަބޫލުކޮށް އުފަލުގައި ހުރުމެވެ. ޝުކުރުވެރިވެގެން ހުރުމެވެ.
- ޝައިޚް މުޙައްމަދު ބާޖައުރުގެ ދަރުސަކުން
