ރައީސް ޔާމީނުގެ ސަރުކާރުން ވަނީ އެކި ފަހަރު މަތިން 100 ކައުންސިލަރުން ސަސްޕެންޑްކޮށްފައި ކަމަށާއި ލާމަރުކަޒީ ނިޒާމުން ވެރިކަން ހިންގުމުގެ މަސައްކަތް ޖެހޭނީ އަލުން ފަށަން ކަމަށް މާލޭގެ މޭޔަރުކަން ކުރައްވާފައިވާ މުޙައްމަދު ޝިހާބް ވިދާޅުވެއްޖެއެވެ.
ޓްރާންސިޝަނަލް ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައި މުޙައްމަދު ޝިހާބު ވިދާޅުވީ ލޯކަލް ކައުންސިލުތަކުގެ ޤާނޫނުގައި އޮންނާނީ އެލްޖީއޭގެ ބޯޑަކީވެސް ކައުންސިލްތަކުން ޢައްޔަނު ކުރާ 5 މެންބަރުންގެ މައްޗަށް އެކުލަވައިލާ ބޯޑަކަށް ހެދުމަށް ކަމަށާއި ދުނިޔޭގެ ގިނަ އަދި ކާމިޔާބު ކަމާއިއެކު ލާމަރުކަޒީ ނިޒާމުން ވެރިކަން ކުރާ ޤައުމުތަކުގައި ވެސް އަމަލުކުރަނީ އެ އުޞޫލުން ކަމަށެވެ.
މުޙައްމަދު ޝިހާބު ވިދާޅުވީ ޤާނޫނުގައި އެގޮތަށް އޮއްވައި އެ ޤާނޫނަށްވެސް ބަދަލު ގެނެސް އެލްޖީއޭ އަށް މިހާރު މެންބަރުންވެސް ޢައްޔަނުކުރައްވަނީ ރައީސުލްޖުމްހޫރިއްޔާ ކަމަށެވެ. ލާމަރުކަޒީ ނިޒާމު "ފުނޑިގެން" ދިއަ އެންމެ ބޮޑު އެއް ސަބަބަކީ ޤާނޫނަށް އެބަދަލު ގެނައުމުން ކަމަށެވެ.
މިހާރު ކަންކަން އޮތީ އެޓޯލްސް މިނިސްޓްރީ އިން ކަންކަން ހިންގި ދުވަސްވަރަށްވުރެ ވެސް ނުބައިކޮށްކަން ބައްދަލުވުމުގައި ފާހަގަކުރިއެވެ. ސަބަބެއް ކަމަސް ބުނެފައިވަނީ އެއިރު އެޓޯލސް މިނިސްޓްރީއަށް ކަންކަން ހުށަހެޅުމުން ކަންކަން ރަނގަޅުކުރެވޭ ކަމަށާއި މިހާރު ކަމެއް ހުށަހަޅާނެ އެއްވެސް ފަރާތެއް، ޒިންމާ އުފުލާނެ އެއްވެސް ފަރާތެއް ނެތުން ކަމަށެވެ.
