މާލޭގެ ބޮޑުތަކުރުފާނު މަގުގައި ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ނެގުމަށް ޚާއްޞަ އޮޕަރޭޝަނެއް ދިވެހި ފުލުހުންގެ ޚިދުމަތުން ފަށައިފިއެވެ. މި އޮޕަރޭޝަނަކީ މަގުމަތީގެ ތޮއްޖެހުން ކުޑަކުރުމަށާއި، ދަތުރުފަތުރަށް ހުރަސްއެޅޭ ގޮތަށް ޕާކުކޮށްފައި ހުންނަ އުޅަނދުތައް ނެގުމަށް ކުރިއަށްގެންދާ ހަރަކާތެކެވެ.
ފުލުހުން މަޢުލޫމާތު ދެއްވި ގޮތުގައި، މި އޮޕަރޭޝަނުގެ ތެރެއިން މިހާތަނަށް 9 އުޅަނދެއް ވަނީ ނަގާފައެވެ. އަދި މި މަސައްކަތް މެދުކެނޑުމެއްނެތި މިރޭވެސް ކުރިއަށްދާނެ ކަމަށް ފުލުހުން ވަނީ ވިދާޅުވެފައެވެ. މި އޮޕަރޭޝަން މިހާތަނަށް މައިގަނޑު ގޮތެއްގައި ހިންގާފައިވަނީ މާލޭގެ ބާޒާރުމަތީ ސަރަޙައްދުގައެވެ.
ބާޒާރުމަތީ ސަރަޙައްދަކީ އާންމުންނަށް ލުއިފަސޭހަކޮށްދިނުމުގެ ގޮތުން ސަރުކާރުން ދާދިފަހުން މަގު ފުޅާކޮށް، ތާރުއަޅައިގެން ތަރައްޤީކޮށްފައިވާ ސަރަޙައްދެކެވެ. މިއާއެކު އެ ސަރަޙައްދުގެ ތޮއްޖެހުމަށް ބޮޑު ހައްލެއް ލިބިގެންދިޔަނަމަވެސް، ފަހަކަށް އައިސް މަގުގެ ދެފަރާތުގައި ޤަވާއިދާ ޚިލާފަށް ވެހިކަލް ޕާކުކުރާ މިންވަރު ވަނީ އިންތިހާއަށް އިތުރުވެފައެވެ. އޭގެ ސަބަބުން އެ ސަރަޙައްދުން ދުއްވާ އުޅަނދުތަކަށާއި، އެކިއެކި ޚިދުމަތްތައް ހޯދުމަށްދާ އާންމު ރައްޔިތުންނަށް ދަނީ ބޮޑެތި ދަތިތަކާ ކުރިމަތިވަމުންނެވެ.
މާލޭގެ ބާޒާރުމަތީގެ އިތުރުން، ހުޅުމާލޭގައިވެސް ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް މާދަމާ ފެށުމަށް ފުލުހުން ވަނީ ނިންމާފައެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި، މަގުމަތީގައި ޤަވާއިދާ ޚިލާފަށް އުޅަނދު ޕާކުނުކުރުމަށާއި، އެގޮތަށް ޕާކުކޮށްފައިވާ އުޅަނދުތައް ވީއެންމެ އަވަހަކަށް ނެގުމަށް ދިވެހި ފުލުހުންގެ ޚިދުމަތުން ވަނީ އެންމެހައި ފަރާތްތަކަށް އިލްތިމާސްކުރައްވާފައެވެ.
