އިންޓަރޕޯލްގެ ކެޕޭސިޓީ ބިލްޑިންގ އެންޑް ޓްރެއިނިންގ ޑިރެކްޓަރޭޓްގެ ފްލެގްޝިޕް ޕްރޮގްރާމެއް ކަމަށްވާ "އިންސްޓްރަކްޓަރ ޑިވެލޮޕްމަންޓް ކޯސް" ނިންމުމުގެ ރަސްމިއްޔާތު އައްޑޫ ސިޓީގައި ބާއްވައިފިއެވެ. މި ތަމްރީނު ޕްރޮގްރާމް ކުރިއަށް ގެންގޮސްފައިވަނީ ސެޕްޓެމްބަރު 27 އިން އޮކްޓޫބަރު 1 ގެ ނިޔަލަށް، ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ އައްޑޫ ސިޓީ ކެމްޕަހުގައެވެ.
ޕްރޮގްރާމް ނިންމުމަށް މިއަދު ބޭއްވި ޚާއްޞަ ރަސްމިއްޔާތުގައި ނޭޝަނަލް ކޮލެޖް އޮފް ޕޮލިސިންގ އެންޑް ލޯ އެންފޯސްމަންޓްގެ ހެޑް، އެސިސްޓްންޓް ކޮމިޝަނަރ އޮފް ޕޮލިސް އަޙްމަދު ޢަބްދުއްރަޙްމާންއާއި، ކޮލެޖުގެ އިސްވެރިންގެ އިތުރުން އިންޓަރޕޯލްގެ ފަރާތުން ބައިވެރިވެވަޑައިގެންނެވި ޚާއްޞަ މަންދޫބުން ބައިވެރިވެވަޑައިގެންނެވިއެވެ.
މި ކޯހަކީ ޤާނޫނު ތަންފީޒުކުރާ އިދާރާތަކުގެ އޮފިސަރުންނަށް އުނގަންނައިދިނުމުގެ އަސާސީ އަދި ފަންނީ މެތޮޑޮލޮޖީތައް އުނގަންނައިދިނުމަށް ޚާއްޞަކޮށްގެން ފަރުމާކޮށްފައިވާ ޕްރޮގްރާމެކެވެ. އެގޮތުން ބޮޑެތި މީހުންނަށް ކިޔަވައިދިނުމުގެ އުސޫލުތަކާއި، އިންސްޓްރަކްޝަނަލް ސިސްޓަމް ޑިޒައިނިންގ އަދި ޒަމާނީ ފުލުހުންގެ ތަމްރީނުތައް ފޯރުކޮށްދިނުމުގައި ބޭނުންކުރާ ހަރުދަނާ އުކުޅުތަކަށް ބައިވެރިން އަހުލުވެރިކުރުވުން މި ކޯހުގެ މަޤްޞަދުތަކުގެ ތެރޭގައި ހިމެނެއެވެ.
މި ތަމްރީނު ޕްރޮގްރާމުގެ ތެރެއިން އިންސްޓްރަކްޝަނަލް ސިސްޓަމް ޑިޒައިން މޮޑެލްތައް ބޭނުންކޮށްގެން އަމިއްލައަށް ލެސަން ޕްލޭން ތައްޔާރުކުރުމާއި، ޕަބްލިކް ސްޕީކިންގ އަދި ޕްރެޒެންޓޭޝަން ހުނަރުތައް ތަރައްޤީކުރުމުގެ ބައިތައް ވަނީ ކުރިއަށް ގެންގޮސްފައެވެ. މީގެއިތުރުން، އުނގެނުމުގެ ތެރެއިން ބައިވެރިން ޝައުޤުވެރިކުރުވުމުގެ އުކުޅުތަކާއި، ފެންވަރު ވަޒަންކުރުމުގެ (އެސެސްމަންޓް) މުހިންމު ހުނަރުތައް ވެސް ބައިވެރިންނަށް ވަނީ އުނގަންނައިދީފައެވެ.
އިންޓަރޕޯލްގެ އެކި ޒޯންތައް ތަމްސީލުވާ ގޮތަށް 13 ޤައުމަކުން ޖުމުލަ 23 އޮފިސަރުން ބައިވެރިވި މި ތަމްރީނަކީ، އިންޓަރޕޯލްގެ މެންބަރު ޤައުމުތަކުގެ ޤާނޫނު ތަންފީޒުކުރާ އޮފިސަރުން އެއްތަންވެ، ބައިނަލްއަޤުވާމީ ފެންވަރުގައި ފުލުހުންގެ މެދުގައި އޮންނަ ގުޅުން އިތުރަށް ވަރުގަދަކޮށް، މުއައްސަސާތަކުގެ މެދުގައި އެއްބާރުލުން ބޮޑުކުރުމަށް ހުޅުވިގެންދިޔަ މުހިންމު ފުރުޞަތެކެވެ.
