ސަރުކާރުގެ ވުޒާރާތަކުން ކުރިއަށްގެންދާ މަސައްކަތްތަކުގެ ތަފްޞީލުތައް ހާމަކުރުމަށާއި، ރައްޔިތުންގެ ކަންބޮޑުވުންތަކާއި ސުވާލުތަކަށް ސީދާ ވަޒީރުންގެ އަރިހުން ޖަވާބު ހޯދައިދިނުމުގެ މަޤްޞަދުގައި ބާއްވާ "އަހާ" ފޯރަމްގެ އަށްވަނަ ސެޝަން މިއަންނަ އާދިއްތަ ދުވަހުގެ ރޭ 21:00 ގައި ބޭއްވުމަށް ހަމަޖެހިއްޖެއެވެ.
ރައީސުލްޖުމްހޫރިއްޔާގެ އޮފީހާއި ޕަބްލިކް ސަރވިސް މީޑިއާ (ޕީއެސްއެމް) ގުޅިގެން ގެނެސްދޭ 2 ގަޑިއިރުގެ މި ފޯރަމަކީ ސަރުކާރުގެ މަސައްކަތްތަކާ މެދު އާންމުން ހޭލުންތެރިކުރުވައި، ސަރުކާރުގެ އެންމެ އިސް ފަރާތްތަކާ ސީދާ ބައްދަލުކޮށް ސުވާލުކުރުމުގެ ފުރުޞަތު ފަހިކޮށްދިނުމުގެ ގޮތުން ސިލްސިލާކޮށް ކުރިއަށްގެންދާ ޕްރޮގްރާމެކެވެ.
މިފަހަރުގެ އެޕިސޯޑުގައި ތިން ވަޒީރަކު ބައިވެރިވެވަޑައިގަންނަވާނެއެވެ. އޭގެތެރޭގައި ހިމެނިވަޑައިގަންނަވަނީ އިޤުތިޞާދީ ތަރައްޤީއާއި ދަތުރުފަތުރާ ވިޔަފާރިއާ ބެހޭ ވަޒީރު މުޙައްމަދު ސަޢީދު، ދިފާޢީ އަދި ވަތަނީ ޚިދުމަތާ ބެހޭ ވަޒީރު ޙަސަން ރަޝީދު އަދި ބަންޑާރަނައިބު އަލްއުސްތާޛު އަޙްމަދު އުޝާމެވެ.
މި ފޯރަމްގައި ބައިވެރިވާން ބޭނުންވާ ފަރާތްތަކަށް ފޯރަމް ބާއްވާ ތަނަށް ސީދާ ހާޒިރުވެގެން ސުވާލުކުރުމުގެ ފުރުޞަތު އޮންނާނެއެވެ. މީގެއިތުރުން، ފޯރަމް ކުރިއަށްދާ ވަގުތު އޮންލައިން ވަސީލަތްތައް މެދުވެރިކޮށްވެސް ސުވާލު ފޮނުވޭނެއެވެ.
މި ފޯރަމް މެދުވެރިކޮށް ވަޒީރުންނާ ކުރަން ބޭނުންވާ ސުވާލުތައް ފޮނުވުމުގެ ފުރުޞަތު މިހާރު ވަނީ އާންމުންނަށް ހުޅުވާލެވިފައެވެ.
