މި އަހަރުގެ މިހައި ތަނަށް މުދަލު ޒަކާތުގެ ގޮތުގައި ބަލައިގަތް ޢަދަދު، 2025ވަނަ އަހަރު އެއްކޮށް ލިބުނު ޖުމުލަ ޢަދަދަށް ވުރެ އިތުރުވެއްޖެއެވެ. އެގޮތުން 2026ވަނަ އަހަރުގެ ސެޕްޓެންބަރު މަހުގެ ނިޔަލަށް މުދަލު ޒަކާތުގެ ގޮތުގައި ޖުމްލަ 109.26 މިލިއަން ދިވެހި ރުފިޔާ ވަނީ ބަލައިގަނެފައެވެ.
ތަފާސްހިސާބުތައް ދައްކާ ގޮތުން 1 ޖަނަވަރީ 2026 އިން ފެށިގެން 30 ސެޕްޓެމްބަރު 2026 ގެ ނިޔަލަށް މުދަލު ޒަކާތުގެ ގޮތުގައި ޖުމްލަ 109,262,025.69 ރުފިޔާ ލިބިފައިވެއެވެ. މިއީ 2025 ވަނަ އަހަރު މުޅިއެކު ލިބުނު 106,456,071.00 ރުފިޔާއަށްވުރެ 2,805,954.69 ރުފިޔާ އިތުރު ޢަދަދެކެވެ. މިއީ މިދިޔަ އަހަރުގެ ޖުމުލަ ޢަދަދާ އަޅާބަލާއިރު ގާތްގަނޑަކަށް %2.64 ގެ ކުރިއެރުމެކެވެ.
މި އަހަރުގެ ސެޕްޓެމްބަރު 30 ގެ ނިޔަލަށް ބަލައިގަތް ފައިސާގެ ތަފްޞީލަށް ބަލާއިރު، ދިވެހި ރުފިޔާއިން ޖުމްލަ 108,739,116.62 ރުފިޔާ ލިބިފައިވާއިރު، ބޭރު ފައިސާގެ ގޮތުގައި 34,021.41 ޔޫ.އެސް ޑޮލަރު ވެސް ވަނީ ބަލައިގަނެފައެވެ.
ފާހަގަކޮށްލެވޭ ގޮތުގައި މި ދިޔަ އަހަރުގެ ޖުމުލަ ޢަދަދު ފަހަނަޅައި ގޮސްފައި މިވަނީ މިއަހަރު ނިމެން އަދި ތިން މަސްދުވަސް ބާކީ އޮއްވައެވެ. އެހެންކަމުން އޮކްޓޫބަރު މަހުން ފެށިގެން ޑިސެމްބަރު މަހުގެ ނިޔަލަށް ލިބޭ ފައިސާއާއެކު، މިއަހަރުގެ ނިޔަލަށް ލިބޭ ޖުމުލަ ޢަދަދު އިތުރަށް މައްޗަށް ދާނެ ކަމަށް ބެލެވެއެވެ.
