މަންތާއެއާގެ ފުރަތަމަ މަތިންދާ ބޯޓު (އޭޓީއާރް 72-600) މިއަދު ރާއްޖެ ގެނެސްފިއެވެ.
އަތޮޅުތެރޭގެ އުދުހުންތަކަށް ޚާއްސަ ކޮށްގެން އުފެއްދި މަންތާއެއާގެ ފުރަތަމަ މަތިންދާބޯޓު ރާއްޖެ ގެނައުމާއި ގުޅިގެން މިއަދު ވެލާނާ އިންޓަނޭޝަނަލް އެއާޕޯޓުގައި ޚާއްސަ ރަސްމިއްޔާތެއް ބާއްވާފައިވެއެވެ. އެރަސްމިއްޔާތުގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އިސްވެރިން ވެސް ބައިވެރިވެފައިވެއެވެ.
މިރަސްމިއްޔާތުަގައި ވާހަކަ ދައްކަވަމުން މަންތާ އެއާގެ ޗީފް އެގްޒެކެޓިވް އޮފިސަރު މުޙައްމަދު ޚަލީލު ވިދާޅުވީ، ރާއްޖޭގެ ސިވިލް އޭވިއޭޝަން އޮތޯރިޓީން ލިބެންޖެހޭ ހުއްދަތައް ލިބުމާއެކު ދަތުރުތައް ފަށާނެ ކަމަށެވެ.
ޚަލީލް ވިދާޅުވި ގޮތުގައި އެއާލައިނުން ފުރިހަމަ ޚިދުމަތްތަކާއެކު ވެލާނާ އިންޓަނޭޝަނަލް އެއާޕޯޓުން އެންމެ ފުރަތަމަ އުދުހުންތައް ފަށާނީ ދ. ކުޑަހުވަދޫ އަށެވެ. އަދި ކުރިއަށް އޮތްތާނގައި ބ. ދަރަވަންދޫ އާއި ތ، ތިމަރަފުށީ އެއާޕޯޓަށް ވެސް ދަތުރުތައް ކުރަން ހަމަޖެހިވާ ވާކަމަށް ވެސް ޚާލީލު ވިދާޅުވިއެވެ.
