"ﷲ ތައާލާގެ މިނިވަރުފުޅުން ބިލްގޭޓްސް އަކީ ދުނިޔޭގެ އެންމެ މުއްސަނދި މީހުންގެތެރެއިން އެކެކެވެ. ބިލް ގޭޓްސްގެ ނަމަށް ބަލާށެވެ! އެމެރިކާ މީހުން ޑޮލަރަށް ބިލް ކިޔައެވެ. ވީމާ ބައަކަށް އޭނާވެފައިއެވަނީ ޑޮލަރު ލިބޭ ދޮރާށްޓަކަށެވެ!
އަހަރެމެން މުސްލިމުންނަށް ދޮރާށި މުޅިން ތަފާތެވެ! އަހަރެމެންނަށް ޑޮލަރު ނުވަތަ އެނޫން ކަމެއް ނަމަވެސް ލިބުމުގެ ދޮރާށްޓަކީ ﷲ ތަޢާލާއެވެ. ﷲ ތައާލާ އެކަލާނގެ ދޮރާށިކޮޅުތައް ހުޅުއްވަވައިލެއްވެވުމުން ކޮންމެވެސް މަގަކުން، ކޮންމެވެސް މީހަކު މެދުވެރިވެގެން ނުވަތަ އެނޫންވެސް ގޮތަކުން ހުރިހާ ނިޢްމަތްތަކެއްވެސް ލިބިގެންދާނެއެވެ!
ﷲ ތަޢާލާގެ ރަޙްމަތުގެ ދޮރުކޮޅުތަކުގައި ޓަކި ޖެހޭނެއެވެ! އެކަމަށްޓަކައި ޢަމަލުކުރަންވީގޮތް ﷲ ތަޢާލާ ވަނީ އަންގަވައި ބަޔާންކުރައްވަވައިފައެވެ. ޓަކި ޖެހުމާއި ނުޖެހުމަކީ އެމީޙެއްގެ ކަމެކެވެ!"
މިއީ މުފްތީ މެންކް ވިދާޅުވެފައިވާ ވަރަށް ޢިބްރަތްތެރި ބަސްފުޅެކެވެ. ކޮންމެ މީހަކުވެސް ގަދައަޅައި މަސައްކަތކުރަންވީ ރިޒުޤުގެ ދޮރުކޮޅުތަކުގައާއި ސުވަރުގޭގެ ދޮރުކޮޅުތަކުގައި ޓަކިޖަހައިލެވޭނެ މީހަކު ކަމުގައިވުމަށެވެ! ޓަކައިޖަހައިލެވޭނެ މީހަކަށް ވެވިއްޖެނަމަ އެމީހަކަށްޓަކައި ހުރިހާ ދޮރުކޮޅުތަކެއްވެސް ﷲ ތަޢާލާ ހުޅުއްވަވައި ދެއްވަވާނެތެވެ! ﷲ ތަޢާލާ ސުވަރުގެ ހައްދަވައި އިންސާނާއަށް ވިސްނަންވެސް ނުއެނގޭނެހައި ގިނަ ނިޢްމަތްތައް އެތަނުގައި ލައްވަވައި އެތަނަށް މީސްތަކުން ވެއްދެވުމަށް 8 ދޮރުކޮޅު ލައްވަވާފައި އެވަނީ މީސްތަކުން ސުވަރުގެ ވެއްދެވުމަށެވެ. މީސްތަކުންނަށް އެމީހުންގެ ހިތް ފުރޭހައި ނިޢްމަތްތައް މިންވަރު ކުރެއްވެވުމަށެވެ! އެކަންކަމަށް ﷲ ތަޢާލާ ލޯބިވެވޮޑިގަންނަވާތީއެވެ!
ﷲ ތަޢާލާ ދެއްވަވާފައިވާ ދައުވަތު ޤަބޫލުކުރާށެވެ! ކިތަންމެ ބޮޑު ޤުރްބާނީއެއްވެގެން ނަމަވެސް ސުވަރުގެ ވަންނަން ގަދައަޅައި މަސައްކަތްކުރާށެވެ! އެ ދައުވަތު ޤަބޫލުނުކުރާ މީހާއަށް ހުރީ ގަދަފަދަ ޢަޛާބުން ފުރިގެންވާ ނަރަކައެވެ! އެތަނަށް ކޮންމެ މީހަކުވެސް ވަންނާނީ އެމީހާ އެކަމަށް ބޭނުންވީތީއެވެ! ﷲ ތަޢާލާ ދެއްވަވާ ނިޢްމަތްތަކަށް ދަހިވެތިވެ ސުވަރުގެ ވަންނަން މަސައްކަތްނުކުރީތީއެވެ!
- އިސްލާމީ ތިލަފަތުގެ ދަރުސަކުން
