މި ސަރުކާރުގެ ފުރަތަމަ 100 ދުވަހުގެ ތެރޭގައި ކުރަން ނިންމާފައިވާ ކަންކަމުގެ ތެރޭގައި ހިމެނޭ 5000 ހެލްމެޓް ބެހުމަށްޓަކައި ހެލްމެޓް އެތެރެކޮށްދޭނެ ފަރާތެއް ހޯދަން ޓްރާންސްޕޯޓް މިނިސްޓްރީން އިއުލާނުކޮށްފިއެވެ. އަދި މިކަމަށް ޝައުޤްވެރިވާ ފަރާތްތަކުން މިމަހުގެ 27 ވަނަ ދުވަހުގެ ކުރިން ހުށަހެޅުމަށްވެސް ވަނީ އެދިފައެވެ.
ޓްރާންސްޕޯޓް މިނިސްޓަރު ޢައިޝަތު ނަހުލާ ވިދާޅުވެފައިވަނީ މިފަދަ ކަމެއް ސަރުކާރުން ކުރަނީ މިކަމަށް ހިތްވަރުދީ އެހީތެރިވުމުގެ ގޮތުން ކަމަށެވެ.
ހެލްމެޓު ބަހާނީ ޓްރެފިކަށް އާންމުން ހޭލުންތެރިކުރުމަށް ބާއްވާ ބޮޑު ކެމްޕެއިނެއްގެ ތެރެއިން އަންނަ މަހު މާރިޗް މަހުއެވެ. ޓްރާންސްޕޯޓް މިނިސްޓްރީން ހަމަޖައްސާފައިވަނީ ބްރިޖްމަތިންނާއި ބޮޑުތަކުރުފާނުމަގު، މިހާރު ކިޔާ ރިންގ ރޯޑްގަ އާއި ހައިވޭތަކުގައި މާރިޗްމަހުގެ 10 ވަނަ ދުވަހުން ފެށިގެން ސައިކަލް ދުއްވާއިރު ހެލްމެޓް އަޅަން ޖެހޭނެ ކަމަށެވެ.
ދުއްވާނެ ހައިވޭއެއް ލިބުމުން އައު ކުކުޅަކަށް ގައު ބިހެއް ލިބުމުން މޮޔަވާފަދައިން ބާރު ސްޕީޑްގައި ދުއްވާތީ އެކްސިޑެންޓްތައް ގިނަވެ ޤަވާއިދުން ދުއްވާ ގިނަ ބައަކަށްވެސް ދަނީ ބޮޑެތި އަނިޔާ ލިބެމުންނެވެ. ގިނަ ބައަކު ބުނަނީ ހެލްމެޓް އެޅުމަކީވެސް ކުރަންޖެހިފައިވާ ކަމެއް ކަމަށާއި ނަމަވެސް ފުރަތަމަ ކުރަން ޖެހޭ ކަމަކީ ސްޕީޑް ބެލޭނެ ކެމެރާތައް ބަހައްޓައި ބާރު ސްޕީޑްގައި ދުއްވާ މީހުން ފާހަގަކޮށް ފިޔަވަޅު އެޅުން ކަމަށެވެ.
