ފަޅުރަށްރަށާއި ފަޅުތައް ކުއްޔަށް ދިނުމާ ގުޅޭގޮތުން ރައީސުލްޖުމްހޫރިއްޔާ ތަޞްދީޤުކުރެއްވި އައު ޤާނޫނުގެ ސަބަބުން، ދަނޑުވެރިކަމާއި މެރިކަލްޗާގެ ސިނާޢަތަށް ބޮޑެތި އިންވެސްޓްމަންޓްތަކެއް ގެނައުމުގެ މަގު ފަހިވެގެންދާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު މިހެން ވިދާޅުވީ ސަރުކާރުން ބޭއްވި 'އަހާ' ފޯރަމްގައި ޢާންމު ރައްޔިތުން ކުރި ސުވާލުތަކަށް ޖަވާބުދެއްވަމުންނެވެ.
ވަޒީރު ޝިޔާމްގެ ވާހަކަފުޅުގައި ފާހަގަކުރެއްވި ގޮތުގައި، ސަރުކާރުގެ އެންމެ އިސް އެއް އަމާޒަކީ ދަނޑުވެރިކަން ފުޅާކޮށްގެން ރާއްޖޭގެ ކާބޯތަކެތީގެ ރައްކާތެރިކަން ކަށަވަރުކުރުމެވެ. މިގޮތުން، މީހުން ދިރިއުޅޭ ރަށްރަށުން ޖާގަ ލިބޭ މިންވަރަކުން ބިން ހޯދުމުގެ މަސައްކަތް ކުރެވެމުންދާ ކަމަށާއި، މިހާރުވެސް 2 ހެކްޓަރާއި 4 ހެކްޓަރާ ދެމެދުގެ ބިން ލިބޭ 10 ރަށަކާއެކު މިނިސްޓްރީން މަޝްވަރާކޮށް މަސައްކަތް ކުރަމުންދާ ކަމަށް ވިދާޅުވިއެވެ.
އައު ޤާނޫނާ ގުޅޭގޮތުން ވާހަކަދައްކަވަމުން ވަޒީރު ވިދާޅުވީ، ރާއްޖެއަށް އެތެރެކުރާ މުދަލުގެ މިންވަރު މަދުކޮށް، އިމްޕޯޓް ރިޕްލޭސްކުރުމަށްޓަކައި ބޮޑެތި އިންވެސްޓްމަންޓްތަކަށް ފުރުޞަތު ފަހިކޮށްދޭންޖެހޭ ކަމަށެވެ. އަދި އައު ޤާނޫނުގައި އިންވެސްޓަރުންނަށް ލުއިފަސޭހަ ގޮތްތަކެއް ހަމަޖައްސައިދީފައިވާނެ ކަމަށާއި، މީގެ ސަބަބުން ވަޒީފާގެ އައު ފުރުޞަތުތައް އުފެދި، ރާއްޖެއިން ބޭރުވާ ބޭރު ފައިސާ ހިފެހެއްޓުމަށް ބޮޑު ބާރަކަށް ވާނެ ކަމަށް ވިދާޅުވިއެވެ.
މީގެއިތުރުން، މެރިކަލްޗާ ސިނާޢަތަކީ ރާއްޖެއަށް ބޮޑު އާމްދަނީއެއް ހޯދައިދެވޭނެ ދާއިރާއެއްކަން ފާހަގަކުރައްވަމުން ވަޒީރު ވިދާޅުވީ، މި މަސައްކަތަށްޓަކައި ވަޒީރުންގެ މަޖިލީހުން މިހާރު ރާއްޖޭގެ 13 ސަރަޙައްދެއް ޚާއްޞަ ޒޯނުތަކެއްގެ ގޮތުގައި ކަނޑައަޅާފައިވާ ކަމަށެވެ. ކުރިން ކުދި ފެންވަރުގައި ކުރިއަށްގެންދިޔަ މި މަސައްކަތަށް މިހާރު 10 މިލިއަނާއި 15 މިލިއަން ޑޮލަރާ ދެމެދުގެ ބޮޑެތި އިންވެސްޓްމަންޓްތައް ލިބެމުންދާ ކަމަށާއި، އަމާޒަކީ ރާއްޖެއަށް އެތެރެކުރާ އަދި އާންމުކޮށް އުފައްދަން ދަތި ބާވަތްތައް މި ސިނާޢަތުގެ ތެރެއިން އާލާކުރުން ކަމަށްވެސް އެމަނިކުފާނު ވިދާޅުވިއެވެ.
ޤާނޫނު ތަންފީޛުކުރުމާ ގުޅޭގޮތުން ޝިޔާމް ވިދާޅުވީ، ރައީސުލްޖުމްހޫރިއްޔާ ޤާނޫނު ތަޞްދީޤުކުރެއްވިތާ އެއް މަސް ފަހުން ޤާނޫނަށް ޢަމަލުކުރަން ފެށޭނެ ކަމަށެވެ. ޤާނޫނުގެ ދަށުން ހަދަންޖެހޭ ގަވާއިދުތައް އެކުލަވައިލުމަށް 3 މަސް ދުވަހުގެ މުއްދަތެއް ލިބުނު ނަމަވެސް، އެއް މަސް ދުވަހުގެ ތެރޭގައި އެ މަސައްކަތް ނިންމުމަށް މިނިސްޓްރީގެ ޓީމުން އަންނަނީ މަސައްކަތް ކުރަމުންނެވެ. އެހެންކަމުން، އޮކްޓޯބަރު މަހުގެ ފުރަތަމަ ހަފުތާގެ ތެރޭގައި ގަވާއިދުތައް އެކުލަވައިލައި ނިންމައި، މިހާރު ލިބިފައިވާ ޕްރޮޕޯސަލްތަކުގެ މަސައްކަތް ކުރިއަށް ގެންދިއުމުގެ އިތުރުން އަލަށް ހުޅުވާލަންޖެހޭ ފުރުޞަތުތައްވެސް ހުޅުވާލެވޭނެ ކަމަށް ވަޒީރު ވިދާޅުވިއެވެ.
ވަޒީރު ޝިޔާމްގެ ވާހަކަފުޅު ނިންމަވާލައްވަމުން ވަނީ، ސަރުކާރުން އަލަށް ގެނައި މި ބަދަލުތަކާއެކު ދަނޑުވެރިކަމާއި މެރިކަލްޗާ ކުރިއަރައި، ޤައުމުގެ ކާބޯތަކެތީގެ ރައްކާތެރިކަން ކަށަވަރުވެ، މި ދާއިރާތަކުން ފެންނަނީ ވަރަށް އުޖާލާ މުސްތަޤުބަލެއް ކަމުގެ ޔަޤީންކަން ދެއްވާފައެވެ.
