ހުޅުމާލެ މިނީ ކޮމްޕްލެކްސްގެ ޖާގައެއްގައި އައު ބެޑްމިންޓަން ހޯލެއް ތަރައްގީކުރުމުގެ މަސައްކަތް ކުރަމުން އަންނަ ކަމަށް ކުޅިވަރާ ބެހޭ ވަޒީރު އަބްދުﷲ ރާފިއު ވިދާޅުވެއްޖެއެވެ.
ވަޒީރު މިހެން ވިދާޅުވީ ސަރުކާރުން ބޭއްވި "އަހާ" ފޯރަމުގައި އާއްމުން ކުރި ސުވާލުތަކަށް ޖަވާބުދެއްވަމުންނެވެ. މި މަޝްރޫއު ކުރިއަށް ގެންދަން ނިންމާފައިވަނީ ހުޅުމާލޭގައި މިހާރު ހުރި ބެޑްމިންޓަން ކޯޓަށް ދިމާވެފައިވާ ޖާގައިގެ ދަތިކަމަށް އެކަށީގެންވާ ހައްލެއް ހޯދައިދިނުމުގެ މަގުސަދުގައެވެ.
މީގެއިތުރުން، މިހާރު ބޭނުންކުރަމުންދާ ކޯޓުގެ މަރާމާތާ ގުޅޭ މައްސަލަތައް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ގުޅިގެން ހައްލުކުރުމުގެ މަސައްކަތް ވެސް މިހާރު ކުރިއަށްދާ ކަމަށް ވަޒީރު ފާހަގަކުރެއްވިއެވެ.
ސަރުކާރުން އަޅަން ނިންމާފައިވާ މަލްޓިޕާޕަސް އިންޑޯ ކޯޓުތައް ނިމުމުން، އިންޑޯ ކުޅިވަރުތަކަށް ދިމާވެފައިވާ ޖާގައިގެ ދަތިކަމަށް ބޮޑު ހައްލެއް ލިބިގެންދާނެއެވެ. ދުޅަހެޔޮ މުޖުތަމައެއް ބިނާކުރުމަށްޓަކައި ކުޅިވަރުގެ ފުރިހަމަ ވަސީލަތްތައް ގާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުހިންމު އަމާޒެކެވެ.
