ރާއްޖޭގެ ޚާއްސަ އިޤްތިޞާދީ ސަރަޙައްދު (އީއީޒެޑް) ގެ ބޭރުން އެހެން ޤައުމުތަކުގެ ބޯޓުފަހަރުން ބާނަމުންދާ މަހުން، ރާއްޖޭގެ އިޤްތިޞާދަށް ފައިދާ ހޯދޭނެ ގޮތްތަކާމެދު ފުޅާ ދާއިރާއެއްގައި މަޝްވަރާކުރަން ޖެހިފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ވަޒީރު މިހެން ވިދާޅުވީ ދައުލަތުގެ މީޑިއާ (ޕީއެސްއެމް) އިން އިންތިޒާމުކޮށްގެން ކުރިއަށްގެންދިޔަ "އަހާ ފޯރަމް" ގައި ވާހަކަފުޅު ދައްކަވަމުންނެވެ.
ވަޒީރު ޝިޔާމް ފާހަގަކުރެއްވި ގޮތުގައި، ދިވެހިރާއްޖޭގެ ސަރަޙައްދާ ވަރަށް ކައިރީގައި، ނަމަވެސް ރާއްޖޭގެ އިޚްތިޞާޞުން ބޭރު ސަރަޙައްދުތަކުގައި ބޭރުގެ ގިނަ މަސްބޯޓުތަކަކުން އަންނަނީ މަސްވެރިކަން ކުރަމުންނެވެ. އަދި އެ ބޯޓުފަހަރުން ބާނާ މަސް ޕްރޮސެސް ކުރުމަށްޓަކައި ގެންދަނީ މޮރިޝަސް ފަދަ އެހެން ޤައުމުތަކަށް ކަމަށް އެމަނިކުފާނު ވިދާޅުވިއެވެ.
އެ ސަރަޙައްދަކީ ރާއްޖޭގެ އިޚްތިޔާރުން ބޭރުގައިވާ ސަރަޙައްދަކަށް ވާތީ، އެ ބޯޓުތަކުގެ މަސައްކަތްތައް ހުއްޓުވުމަށާއި އެ ފަރާތްތަކާ ދެކޮޅަށް ފިޔަވަޅު އެޅުމުގައި ބޮޑެތި ގޮންޖެހުންތަކެއް ހުރިކަން ވަޒީރު ފާހަގަކުރެއްވިއެވެ. ނަމަވެސް، ރާއްޖޭގެ ސަރަޙައްދީ އިމުގެ ތެރެއަށް ވަދެ ޤާނޫނާ ޚިލާފަށް ހިންގާ ހަރަކާތްތަކާ ދެކޮޅަށް ސަރުކާރުން އަބަދުވެސް ފިޔަވަޅު އަޅަމުންދާނެ ކަމުގެ ޔަޤީންކަން އެމަނިކުފާނު ދެއްވިއެވެ.
މީގެ އިތުރުން ވަޒީރު ވިދާޅުވީ، އީއީޒެޑުން ބޭރުން ބާނާ އެ މަސްތައް ޤާނޫނީ ހަމަތަކުގެ މަތިން ރާއްޖެ އެތެރެކޮށް، ރާއްޖޭގެ ފެކްޓްރީތަކުގައި ޕްރޮސެސްކޮށްގެން ދިވެހި އިޤްތިޞާދަށް އޭގެއިން ނަފާ ހޯދޭނެ އިންތިޒާމުތަކެއް ހަމަޖެއްސުމަކީ ކުރަން މުހިންމު ކަމެއް ކަމަށެވެ. މިކަމަށްޓަކައި ބޭރުގެ ކަމާބެހޭ ފަރާތްތަކާއެކު އެއްބާރުލުން ޤާއިމުކޮށް، ގިނަ މަޝްވަރާތަކެއް ކުރަންޖެހޭ ކަމަށް ވެސް އެމަނިކުފާނު ވިދާޅުވިއެވެ.
ރާއްޖޭގެ މަސްވެރިކަމުގެ ސިނާޢަތް އިތުރަށް ތަރައްޤީކޮށް ކުރިއެރުވުމަށްޓަކައި، މި ސަރަޙައްދުގެ ކަނޑުތަކުގައިވާ މަހުގެ ވަސީލަތްތަކުން ޤައުމަށް ލިބޭ މާލީ މަންފާ އިތުރުކުރެވޭނެ އައު ދޮރުތައް ހުޅުވުމަކީ ސަރުކާރުގެ މުހިންމު އަމާޒެއް ކަމަށް ވަޒީރު ޝިޔާމްގެ ވާހަކަފުޅުގައި ވަނީ ފާހަގަކުރައްވާފައެވެ.
