ޙަޔާތުގެ ކިތަންމެ ކުޑަ ހިނދުކޮޅަކަށް ނަމަވެސް ސިފައިންގެ މީހަކަށް ވެވިއްޖެ މީހަކީ، މުޅި ޙަޔާތުގައިވެސް ސިފައިންގެ މީހެއްކަން ހަނދާނުގައި ބަހައްޓަވަންވާނެ ކަމަށާއި ވަޒީފާ ބަދަލުވި ނަމަވެސް ރިޓަޔަރ ކުރި ނަމަވެސް އެ ހުވާ ނެތިގެނެއް ނުދާނެ ކަމަށް ރައީސް އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
64 ވަނަ އަސާސީ ތަމްރީނު ކޯހުގެ ދަރިވަރުން ސިފައިންގެ ހުވާކުރުމާއި ބަޑި ހަވާލުކުރުމަށް މިރޭ ކަޅުތުއްކަލާ ކޮށީގައި ބޭއްވި ރަސްމިއްޔާތު ޝަރަފުވެރިކޮށް ދެއްވައި ވާހަކަފުޅު ދައްކަވަމުން ރައީސް އިބްރާހީމް މުޙައްމަދު ޞާލިޙް ވިދާޅުވީ ސިފައިންގެ މީހަކަށް ވުމަށް ކުރާ ހުވާގެ ސަބަބުން، ސިފައިންނާ މަތިކުރެވޭ ޒިންމާތަކާއި މަސްއޫލިއްޔަތު، ދުވަހަކުވެސް ސިފައިންނާއި ވަކި ނުވާނެ ކަމަށާއި އެއީ، ދާއިމީ ގޮތެއްގައި އެއަށް ޙުރުމަތްތެރިކޮށްހިތައި ވަފާތެރިވާންޖެހޭނެ ވަޢުދެއް ކަމަށެވެ.
ރައީސް އިބްރާހީމް މުޙައްމަދު ޞާލިޙް ވިދާޅުވީ މާތް ﷲ ގަންދީ ސިފައިން ކުރާ ހުވައަކީ، ހަމައެކަނި ވަޒީފާގެ މުއްދަތަށް ދެމިއޮންނަ ހުވައެއް ނޫން ކަމަށާއި އެ ހުވައަކީ، ޤައުމީ ޖިހާދަށް ނުކުތުމުގެ ފުރަތަމަ ފިޔަވަޅު ކަމަށެވެ.
"ތިއަ ސިފައިން ދެންމެ ތިއަ ކުރެއްވި ހުވައިގައި ވަރަށް މުހިންމު ހަތަރު ކަމަކަށް ވަޢުދުވީ އަޑު އަޅުގަނޑުމެންނަށް އިވިއްޖެ. އެއީ، ޤާނޫނުއަސާސީ ދިފާޢުކުރުން. އިސްލާމްދީން ދިފާޢުކުރުން. އަދި ދިވެހިރާއްޖެ ދިފާޢު ކުރުމާއި، ދުޝްމަނުންނާއި ބާޣީންގެ ކިބައިން ދިވެހި ދައުލަތް ސަލާމަތް ކުރުން. މި މުހިންމު ވާޖިބުތައް އަދާކުރުމުގައި ތެދުވެރިވާނެ ކަމަށާއި، އަމާނާތްތެރިކަންމަތީގައި ދެމިތިބުމަށްވެސް ވަޢުދުވެއްޖައިމު. ތިޔަ ސިފައިން ހުވާ ކުރެއްވީ، އެ ވަޢުދުތައް ފުއްދުމަށްޓަކައި ހަށިގަނޑާއި ފުރާނައިން ޤުރްބާންވާން ޖެހިއްޖެ ޙާލަތެއްގައި ޤުރުބާންވުމަށްވެސް ތައްޔާރުވެ ތިބުމަށް."
ސިފައިންގެ ޚިދުމަތަކީ އެންމެ ޝަރަފުވެރި ޚިދުމަތްކަން ފާހަގަކުރައްވައި ރައީސް އިބްރާހީމް މުޙައްމަދު ޞާލިޙް ވިދާޅުވީ "މިއަދު ތިއަ ސިފައިން ތިއަ ގުޅިވަޑައިގަތީ، މި ރާއްޖޭގެ އެންމެ ޝަރަފުވެރި އަދި އެންމެ ފަޚުރުވެރި ޢާއިލާއާއި" ކަމަށެވެ. އެހެންކަމުން މި ބަދަހި ސަފުތަކުގެ ފަހުލަވާނުންނަކީ، ވަރަށް ތެދުވެރި ވަފާތެރި، އަދި އެހައިމެ އަމާނާތްތެރި ބައެއް ކަމަށެވެ. ދިވެހި ސިފައިންގެ 127 އަހަރުގެ މާޒީ ކަށަވަރުކޮށްދެނީ، ދިވެހި ސިފައިންނަކީ ދުވަހަކުވެސް ޤައުމަށް ޣައްދާރުވާނޭ ބައެއް ނޫންކަން ކަމަށެވެ.
