އަހަރެން މެދުއިރުމަތީގައި ޢާއިލާ އާއިއެކު ކުރި ދަތުރެކެވެ. ފުރަން އެއާޕޯޓަށް ދެވެން އޮތީ ޤައުމެއްގެ ތެރެއިންނެވެ. ޒިމްބާބްވޭގެ ރައްޔިތުންނަށް އެ ޤައުމު ހުރަސް ކުރެވޭނީ ވިސާ އޮވެގެންކަން އެނގުނީ ބޯޑަރު ހުރަސްކުރަން ދިއުމުންނެވެ. ޤަވާއިދަށް އެ ބަދަލު ގެނެސްފައިވަނީ އެއިގެ 2، 3 ދުވަސްކުރިން ކަމަށްވުމުނެވެ.
ކަން ދިމާވިގޮތުން އެއީ ހުކުރު ވަގުތެކެވެ. ބަންގި ގޮވުމުން ބޯޑަރުގައި ހުރި މިސްކިތަކަށް ހުކުރަށް އެރީމެވެ. ސަފުގައި ޖެހިގެން ހުރި މީހާ އަހަރެންނާއި ބައްދަލުވުމުން ސަލާމް ކުރިއެވެ. އަހަރެންވެސް ސަލާމް ކުރީމެވެ.
ހުކުރުގައި އަހަރެންނަށް ކުރިމަތިވެފައިވާ ޙާލަތުން ސަލާމަތްކޮށް ދެއްވަވާތޯ ﷲ ތަޢާލާއަށް ދުޢާ ކުރީމެވެ. ހުކުރު ނިމިގެން ބޯޑަރު އޮފީހަށްގޮސް އަހަރެންގެ މައްސަލަ ކިޔައިދިނީމެވެ. އަހަރެން މިދަނީ ޢާއިލާ އާއިއެކު ފުރަން އެއާޕޯޓަކަށް ކަމަށާއި ބޯޑަރު ހުރަސް ނުކުރެވިއްޖެނަމަ ޓިކެޓް ބަދަލުކުރަންޖެހޭނެ ކަމަށާއި އިތުރު އެތައް ތަކްލީފް ތަކެއް އުފުލަން ޖެހޭނެ ކަމަށް ވެސް ބުނީމެވެ.
ކައުންޓަރުގައި ހުރި މީހާ ދިނީ ވަރަށް ކުރު ޖަވާބެކެވެ. "ތިއަކަމަށް ހުއްދަ ދެވޭނީ ހަމައެކަނި ވެރިމީހާއަށް" ކަމަށެވެ. ވެރިމީހާގެ ކޮޓަރި ދެއްކުމުން ގޮސް ޓަކިޖަހައި ހުއްދަ ލިބިގެން ވަންއިރު ބޮޑުމީހާއަކަށް އިނީ ހުކުރު ނަމާދުގައި އަހަރެންނާއި ޖެހިގެން ހުރެ ސަލާމްކުރި މީހާއެވެ.
އޭނާއަށް އަހަރެންގެ ހާލަތު ކިޔައިދީފައި މިކަމުން އަހަރެން ސަލާމަތްކޮށް ދެއްވޭނީ ހަމައެކަނި ﷲ ތަޢާލާޢަށް ކަމަށް ބުނީމެވެ. އަހަރެންގެ ވާހަކަ އަޑުއެހުމަށްފަހު ވިސްނައިލަން އޭނާ މަޑުކޮށްލިއެވެ. ހީވަނީ ވިސްނައިލީ އެދުވަހުގެ ޚުޠުބާއަށް ހެންނެވެ. ޚުޠުބާގައި އެދުވަހު ކިޔާފައިވަނީ މުޞީބާތެއްގައިވާ މީހަކަށް އެހީތެރިވުމުގެ މަތިވެރިކަމުގެ ވާހަކައެވެ.
ކޮންމެއަކަސް އިރުކޮޅެއްފަހުން އެނާ ވެސް ބުނީ އަހަރެން ބުނިފަދައިންނެވެ. އެ ޙާލަތުން އަހަރެން ސަލާމަތް ކޮށްދެއްވެވޭނީ ހަމައެކަނި ﷲ ތަޢާލާއަށް ކަމަށެވެ. އެހެން ބުނެފައި ބޯޑަރު ހުރަސްކުރުމުގެ ވަގުތީ ހުއްދައެއް ދިނެވެ. އެ ހުއްދަ ކައުންޓަރަށް ދެއްކުމުން އަހަރެންނަށް އެޤައުމުގެ ތެރެއިން ބޯޑަރު ހުރަސްކުރުމުގެ ހުއްދަ ދިނެވެ. މައްސަލަ ޙައްލުވީއެވެ! އަހަރެން ކުރި ދުޢާ ވަގުތުން އިޖާބަކޮށް ދެއްވެވީއެވެ!
ވީމާ ދުޢާކުރަންވީ ވަކިކަމަކަށް އެދިއެއް ނޫނެވެ! ވަކިހާލަތެއް ކުރިމަތިވުމަކުން ނޫނެވެ! ކޮންމެ ޙާލަތެއްގައި ކޮންމެ ކަމަކަށް އެދިވެސް ދުޢާކުރަންވީއެވެ!
- މުފްތީ މެންކުގެ ދަރުސަކުން
ވިސްނައިލުން މުހިންމު ނުކުތާއެއް:
މުފްތީ މެންކް އޭނާގެ އެހީތެރިކަމަށް އިންތިހާއަށް ބޭނުންފުޅުވެ ހުންނަވައިވެސް ބޭނުންފުޅު ކުރެއްވި ޢިބާރާތަށް ވިސްނައިލާށެވެ! " މިކަމުން އަހަރެން ސަލާމަތްކޮށް ދެއްވޭނީ ހަމައެކަނި ﷲ ތަޢާލާޢަށް ކަމަށް" ވިދާޅުވި ވިދާޅުވުމެވެ. އޭނާގެ އެހީތެރިކަމަށް އެދިވަޑައި ނުގެން ﷲ ތައާލާގެ ޙަޟްރަތުން ވާގިއެދިވަޑައިގެންނެވިކަމެވެ. އެގޮތަށް ވިދާޅުވުމުން ﷲ ތަޢާލާ އެވަނީ އެކަން ކޮށްދޭން ހުރި މީހާ މެދުވެރިކުރައްވަވައި މުފްތީ މެންކުގެ ބޭނުންފުޅު ފުއްދަވައި ދެއްވަވާފައި ކަމެވެ.
