އިމާރާތްކުރުމުގެ މަސައްކަތްތައް ކުރިއަށްގެންދާއިރު ބިމުގެ އަޑީގައިވާ ކަރަންޓު ވިއުގައަށް އެއްވެސް ގެއްލުމެއް ނުވާނޭހެން މަސައްކަތްތައް ރާވައިގެން ކުރިއަށް ގެންދިއުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އިލްތިމާސްކޮށްފިއެވެ.
ސްޓެލްކޯއިން މިކަމަށް އިލްތިމާސްކޮށްފައިވަނީ ހުޅުމާލޭގެ ފުރަތަމަ ފިޔަވަހިން މިއަދު ކަރަންޓުގެ ޚިދުމަތް މެދުކެނޑެން މެދުވެރިވި ހާދިސާއާ ގުޅިގެންނެވެ. އެ ކުންފުނިން ހާމަކުރި ގޮތުގައި މިއަދު ކަރަންޓު ކެނޑުނީ ހުޅުމާލޭ ކުރެދިމާ ހިނގުމުގައި އަމިއްލަ ފަރާތަކުން ކުރިއަށްގެންދިޔަ ޢިމާރާތްކުރުމުގެ މަސައްކަތެއްގެ ތެރެއިން ބިންކޮނުމުގެ ތެރޭގައި ހައިވޯލްޓޭޖް ކޭބަލަކަށް ގެއްލުންވުމާ ގުޅިގެންނެވެ.
މީގެ އިތުރުން، މިދިޔަ ބުރާސްފަތި ދުވަހުވެސް މިފަދަ ހާދިސާއެއް ހިނގައި، ހުޅުމާލެ ފުރަތަމަ ފިޔަވަހީގެ ބައެއް ސަރަޙައްދުތަކުން ކަރަންޓުގެ ޚިދުމަތް ކެނޑިފައިވާ ކަމަށް ސްޓެލްކޯއިން ފާހަގަކުރެއެވެ. މިގޮތަށް ކައިރިކައިރީގައި މިފަދަ ހާދިސާތައް ތަކުރާރުވެ، ކަރަންޓުގެ ވިއުގައަށް ގެއްލުންވެ ޚިދުމަތް މެދުކެނޑުމަކީ ޢާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހޭ ވަރަށް ބޮޑު ކަންބޮޑުވުމެއް ކަމަށް އެ ކުންފުނިން ބުނެފައިވެއެވެ.
އެހެންކަމުން، ޢިމާރާތްކުރުމާއި މަގުކޮނުމުގެ މަސައްކަތްތައް ކުރިއަށްގެންދަވާ ހުރިހާ ފަރާތްތަކުންވެސް މިހާރަށްވުރެ ބޮޑަށް ޒިންމާދާރުވެ، އަޑީގައިވާ ކަރަންޓު ވިއުގައަށް ގެއްލުން ނުވާނޭހެން ސަމާލުކަން ދީގެން މަސައްކަތްތައް ރޭވުމަށް ސްޓެލްކޯއިން ވަނީ ހަނދާންކޮށްދީފައެވެ.
