ނޭޕާލަށް ބޯކޮށް ވާރޭވެހި، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން ހިނގި ހިތާމަވެރި ހާދިސާތަކާ ގުޅިގެން، އެ ޤައުމުގެ ބޮޑުވަޒީރު، ރައިޓް އޮނަރަބަލް ބަލެންދްރަ ޝާހަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޢުޒިޔާގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާ ފޮނުއްވި މެސެޖުގައި، މި ކާރިސާގައި އެތައް ބައެއްގެ ފުރާނަ ގެއްލި، ރައްޔިތުންނަށް ކުރިމަތިވި ތަކުލީފުތަކާ މެދު ފުން ހިތާމައެއް ލިބިވަޑައިގެންނެވި ކަމަށް ބަޔާންކުރައްވާފައިވެއެވެ.
ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ވަނީ ނޭޕާލްގެ ބޮޑުވަޒީރަށާއި، ސަރުކާރަށާއި، ރައްޔިތުންނަށް، ޚާއްޞަކޮށް މި ހާދިސާގައި ފުރާނަ ގެއްލުނު މީހުންގެ ޢާއިލާތަކަށާއި، ވީނުވީއެއް ނޭނގި ގެއްލިފައިވާ ފަރާތްތަކުގެ ޢާއިލާތަކުގެ އިތުރުން މި ކާރިސާގެ އަސަރުކުރި އެންމެހައި ފަރާތްތަކަށް އިޚްލާޞްތެރިކަމާއެކު ތަޢުޒިޔާ އަރިސްކުރައްވާފައެވެ.
މީގެއިތުރުން، މި ހާދިސާތަކުގައި އަނިޔާވި ފަރާތްތަކަށް އަވަސް ޝިފާއަކަށް އެދިވަޑައިގެން، މިހާރު ކުރިއަށްދާ މީހުން ސަލާމަތްކުރުމާއި، އެހީތެރިކަން ފޯރުކޮށްދިނުމުގެ މަސައްކަތްތަކަށް ކާމިޔާބީއަށް ރައީސުލްޖުމްހޫރިއްޔާ އެދިވަޑައިގެންނެވިއެވެ.
ރައީސުލްޖުމްހޫރިއްޔާގެ ރަސްމީ 'އެކްސް' އެކައުންޓުން ކުރެއްވި ޕޯސްޓެއްގައި ވަނީ، ނޭޕާލްގެ ރައްޔިތުންނާއެކު ދިވެހިރާއްޖެ ސާބިތުވެ އޮތްކަން ހާމަކުރައްވައި، މި ކާރިސާގެ އަސަރުކުރި އެންމެހައި ފަރާތްތަކަށް ރައްކާތެރިކަމާއި ކެތްތެރިކަން މިންވަރުކުރެއްވުމަށް އެދިވަޑައިގެންފައެވެ.
