ނޭޝަނަލް އިންސްޓިޓިއުޓް އޮފް އެޑިޔުކޭޝަން (އެން،އައި،އީ) އިން އިންތިޒާމުކޮށްގެން ކުރިޔަށް ގެންދާ ކަރިކިއުލަމް ޓީ،އޯ،ޓީ ވޯރކްޝޮޕް މިއަދު އިފްތިތާޙުކޮށްފިއެވެ.
މިމަހުގެ 15 އިން 17 އަށް އަޙުމަދިއްޔާ އިންޓަރ ނޭޝަނަލް ސްކޫލްގެ ހޯލުގައި ކުރިޔަށްދާ މިވޯރކްޝޮޕް އިފްތިތާޙް ކޮށްދެއްވީ، މިނިސްޓަރ އޮފް އެޑިޔުކޭޝަން ޑޮކްޓަރ ޢައިޝަތު ޢަލީ އެވެ.
އެޑިޔުކޭޝަނުން ބުނެފައިވަނީ ކީސްޓޭޖް 4 އަށް މުދައްރިސުން އަހުލުވެރި ކުރުމުގެ މަޤުޞަދުގައި ކުރިޔަށް ގެންދާ މިވޯރކްޝޮޕްގައި ޓީ،އާރު،ސީ ތަކާ، މާލެއާ އަތޮޅުތެރޭގެ ސްކޫލްތަކުން 100 ޓިޗަރުން ބައިވެރިވެލެއްވިއެވެ. މި 100 ޓީޗަރުން އިޚުތިޔާރު ކުރުމުގައި ސައިންސާއި ބިޒްނަސް ކިޔަވައިދެއްވާ މުދައްރިސުންނަށް އިސްކަންދީފައިވާނެކަމަށެވެ.
މި ވޯރކްޝޮޕްގެ ސެޝަންތައް ނަންގަވާ ޚާއްޞަ ބޭފުޅުންގެ ތެރޭގައި މިނިސްޓަރް އޮފް ސްޓޭޓް ފޮރ އެޑިޔުކޭޝަން ޑޮކްޓަރް ޢަބްދުﷲ ރަޝީދު އާއި ފިންލޭންޑް އިންޓަރނޭޝަނަލް ސްކޫލް އާއި ބިލަބޮންގހައި އިންޓަރނޭޝަނަލް ސްކޫލްގެ ޓީޗަރުންގެ އިތުރުން ކެމްބްރިޖް ޔުނިވަރސިޓީ ޕްރެސް ގެ ބޭފުޅަކު ހިމެނިވަޑައި ގަންނަވައެވެ. އަދި އެން،އައި، އީ ގެ އެޑިޔުކޭޝަން ޑިވެލޮޕްމަންޓް އޮފިސަރުންނާއި ރާއްޖޭގެ ކޮލެޖްތަކުގައި ކިޔަވައިދެއްވާ ސީނިއަރ ޓިޗަރުންވެސް މި ވޯރކްޝޮޕްގައި މުހިންމު ބައިތަކެއް ކިޔަވައިދެއްވާނެއެވެ.
އެޑިޔުކޭޝަނުން ބުނެފައިވަނީ އުނގަންނައި ދިނުމުގައި، ސައިންސާ ޓެކްނޮލޮޖީ އެންމެ ފުރިހަމަޔަށް ބޭނުން ކުރުމާއި 21 ވަނަ ޤަރުނުގެ ހުނަރުތަކާ އުކުޅުތައް ބޭނުންކޮށްގެން ދަރިވަރުން ގަޔާވާ ގޮތަށް ކިޔަވައިދިނުން ބައްޓަން ކުރާނެ ގޮތްތައް މި ވޯރކް ޝޮޕްގެ ބައިވެރިންނަށް އުނގަންނައި ދެވޭނެއެވެ.
