ލިޔުނީ: ޒިދާން މުހައްމަދު
ހުޅުމާލޭގައި އަމިއްލަ ފަރާތަކުން އިމާރާތްކުރި އައު ޕްރީސްކޫލް އެޑިއުކޭޝަން މިނިސްޓްރީއާ މިއަދު ހަވާލުކޮށްފި އެވެ. ކޮމްޕިއުޓާ ރޫމާއި ހޯލަކާއި ސްޓާފް ރޫމެއް ހިމެނޭ ގޮތައް އިމާރާތްކުރި މި ސުކޫލާ ހަވާލުވަމުން އެޑިއުކޭޝަންގެ ފަރާތުން އެއްބަސްވުމުގައި ސޮއެކުރެއްވީ މިނިސްޓަރު ޑރ. އައިޝަތު އަލީ އެވެ.
މީގެ އިތުރުން، ހުޅުމާލޭ ތަރައްޤީކުރާ ކުންފުނި، ހައުސިން ޑިވަލޮޕްމަންޓު ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރު (އެމްޑީ) ސުހެއިލް އަހުމަދު ވެސް ވަނީ އެއްބަސްވުމުގައި ސޮއެ ކުރައްވާފަ އެވެ.
މިނިސްޓުރީން ވިދާޅުވާ ގޮތުގައި، ހުޅުމާލޭ އޯޓިޒަމް ސުކޫލު ކައިރި ހުންނަ މި ޕްރީ ސްކޫލުން، ޖޫން، ޖުލައި ހިސާބުގައި އިންޓަނޭޝަނަލް ފެންވަރަށް ކިޔަވައިދޭން ފެށޭނެއެވެ. މި ސުކޫލުގެ އިތުރުން ހުޅުމާލޭގައި ހުންނަ ލިޓުލް ޖެމްސް ޕްރީ ސުކޫލަކީ ވެސް އަމިއްލަ ފަރާތަކުން ހިންގާ ސުކޫލެކެވެ. އެތަނުގައި، ބޭބީ ނާސަރީން ފެށީގެން ޔޫކޭޖީއަށް ކިޔަވައިދެއެވެ.
ސަރުކާރުން މިހާތަނަށް ހުޅުމާލޭގައި ޕްރީ ސުކޫލެއް ގާއިމްކޮށްދީފައެއް ނުވެއެވެ. ނަމަވެސް، ހުޅުމާލޭގައި ހުންނަ ސަރުކާރު ސުކޫލުތަކުގައި ނާސަރީއަށް ކިޔަވައިދޭކަން ފާހަގަކޮށްލަމެވެ. އެގޮތުން، ޢާޒީ ސުކޫލާއި ރެހެންދި ސުކޫލު އަދި މިއަހަރު އަލަށް ހުޅުވި ހުރަވީ ސުކޫލުގަވެސް ޕްރީސުކޫލު ލެވަލްއަށް ކިޔަވައިދެއެވެ.
