ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޔުނައިޓެޑް އެރެބް އެމިރޭޓްސް (ޔޫ.އޭ.އީ)އަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މިއަދު ހެނދުނު ރާއްޖެ ވަޑައިގެންފިއެވެ.
މިދަތުރުފުޅުގެ ތެރެއިން ޒާޔިދު ސަސްޓެއިންބިލިޓީ އެވޯޑް ޙަފްލާގައި ބައިވެރިވެވަޑައިގަތުމުގެ ފުރުޞަތު ލިބިވަޑައިގަތުމަކީ ބޮޑު ޝަރަފެއްކަމަށާއި ސަސްޓެއިނަބިލިޓީ އެވޯޑްސް ޙަފްލާގައި ދައްކާލާފައިވާ ޕްރޮޖެކްޓުތަކުން ރާއްޖެއަށް ފައިދާހުރި ފިލާވަޅުތަކެއް ލިބޭނެކަމުގައި ރައީސް އިބްރާހީމް މުޙައްމަދު ޞާލިޙް ވަނީ ވިދާޅުވެފައެވެ.
ރައީސް އިބްރާހީމް މުޙައްމަދު ޞާލިޙް ކުރެއްވި މި ދަތުރުފުޅުގެ ތެރެއިން ޔޫއޭއީގެ އެންމެ އިސް ވެރިންނާއި ބައްދަލު ކުރައްވައި ދެ ޤައުމުގެ ގުޅޫން ބަދަހިކުރެއްވުމާއި އަދި އިޤްޠިޞާދީ ދާއިރާތަކުން ގުޅުން ބަދަހިކުރެއްވުމާއިބެހޭ ގޮތުން ވަނީ މަޝްވަރާ ކުރައްވައިފައެވެ.
ރައީސް ޞާލިޙްގެ މިދަތުރުފުޅަކީ ޔޫ.އޭ.އީގެ ޑެޕިއުޓީ ސުޕްރީމް ކޮމާންޑަރ އޮފް އާމްޑް ފޯސަސް، ހިޒް ހައިނެސް މުޙައްމަދު ބިން ޒާޔިދު އަލް ނަޙްޔާންގެ ދަޢުވަތަކަށް، މިހިނގާ ޖަނަވަރީ މަހުގެ 14 ވަނަ ދުވަހު ބޭއްވި "ޒާޔިދު ސަސްޓެއިނަބިލިޓީ އެވޯޑްސް" އަދި "އިނޯގްރޭޝަން އޮފް ދަ އަބޫދާބީ ސަސްޓެއިނަބިލިޓީ ވީކް" ޙަފްލާގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.
