ރައީސްކަން ކުރައްވާފައިވާ ބޭފުޅަކަށް މަޖިލީހަށް ކުރިމަތިނުލެވޭ ގޮތަށް އިޞްލާޙް ހުށަހެޅީ ޖޮއިންޓް ޕާލަމެންޓްރީ ގްރޫޕް (ޖޭޕީޖީ) ގައި ވެސް އަދި ޖުމްހޫރީ ޕާޓީގެ ޕީޖީ ގްރޫޕުގައި ވެސް މަޝްވަރާ ކުރުމެއް ނެތި ކަމަށް ޕީޖީ ލީޑަރު ޢަބްދުﷲ ރިޔާޟް ވިދާޅުވެއްޖެއެވެ.
ޢަބްދުﷲ ރިޔާޟް މިމޭރުމުން ވިދާޅުވީ ކުރިން ރައީސްކަން ކުރައްވާފައިވާ ބޭފުޅަކަށް މަޖިލިސް އިންތިޚާބުގައި ވާދަ ނުކުރެއްވޭ ގޮތަށް ރައްޔިތުންގެ މަޖިލީހުގެ އިންތިޚާބާއިބެހޭ ޤާނޫނަށް ދިއްދޫ ދާއިރާގެ މެންބަރު ޢަބްދުއްލަޠީފް އިޞްލާޙެއް ހުށަހެޅުއްވުމާއި ގުޅިގެންނެވެ.
ލަޠީފް މިފަދަ އިޞްލާޙެއް ހުށަހަޅުއްވާފައި މިވަނީ މަޖިލިސް އިންތިޚާބުގައި ވާދަކުރައްވަން ނިންމަވައި ރައީސް މުޙައްމަދު ނަޝީދު ކެމްޕޭނު ވެސް ކުރައްވަމުން ގެންދަވަނިކޮށެވެ.
ލަޠީފް ވަނީ ޕީޕީއެމުން ވަކިވެ ޖޭޕީ އާއި ގުޅިފައެވެ. ނަމަވެސް އަލަށް އުފެދޭ ޕާޓީތައް އުފައްދަން ބާއްވާ ބައްދަލުވުންތަކުގައި ބައިވެރިވެ ލަޠީފް ގެންދަވަނީ ވާހަކަވެސް ދައްކަވަމުންނެވެ.
ލަޠީފް މިފަދަ އިޞްލާޙެއް ހުށަހެޅުއްވި ނަމަވެސް ޖޮއިންޓް ޕީޖީ ގްރޫޕުގެ ތާއީދު ނެތި ފާސް ނުކުރެވޭނެކަން ފާހަގަކުރެވެއެވެ.
