ދުވާރުން މަގަށް ނިކުމެވޭނެ ގޮތަށް ސިޓީ ކައުންސިލުން ހެދި ފުރަތަމަ ރޭމްޕް މަތީގައި ވެސް ސައިކަލު ޕާކު ކުރަން ފެށުމުން، އޭގެ ޑިޒައިނަށް ބަދަލު ގެންނަން ނިންމައިފިއެވެ.
މާލޭގައި ވެހިކަލްތައް ޕާކު ކޮށްފައި ހުންނަ ގޮތްތަކުގެ ސަބަބުން ދުވާރުން މަގުމައްޗަށް އަދި މަގުމަތިން ދުވާރަށް އަރައިފޭބުމަށް ދަތިތަކެއް ކުރިމަތިވާތީ، ބައެއް އަމިއްލަ ފަރާތްތަކުން ވަނީ އެމީހުންގެ ގޭދޮރު މައްޗާއި ފިހާރަތައް ކުރިމަތީގައި ލަކުޑި ޕެލެޓު ބަހައްޓާފައެވެ. އެކަން ހުއްޓުވުމަށް ސިޓީ ކައުންސިލުން ނިންމީ މަގުގެ އެކި ހިސާބުތަކުގައި ސިމެންތިން ރޭމްޕު ޖަހާށެވެ.
އެގޮތުން ސިޓީ ކައުންސިލުން އިއްޔެ ވަނީ ޖަނަަވަރީ މަހުގައި ނަމޫނާ ރޭމްޕެއް ޖަހާފައެވެ. ސޮނީ ހާޑްވެއާރ ކުރިމައްޗަށްވާ ގޮތަށް ހެދި އެރޭމްޕަކީ ފަސް ފޫޓު ފަސް އިންޗި ދިގު އަދި 10 ފޫޓު ފުޅާ ރޭމްޕެކެެވެ.
އެކި ގޮތްގޮތަށް ސައިކަލު ޕާކު ކުރާ މީހުންގެ އެކަން އިސްލާހު ކުރުމަށް ސިޓީ ކައުންސިލުން ރޭމްޕް އެއް ޖެހިނަމަވެސް، އެރޭމްޕު ޖެހިތާ 24 ގަޑިއިރު ނުވަނީސް ބައެއް މީހުންވަނީ ރޭމްޕު މަތީގައި ވެސް ސައިކަލު ޕާކު ކޮށްފައެވެ.
އެހެންކަމުން އެމައްސަލައަށް ހައްލެއް ލިބޭތޯ، ސިޓީ ކައުންސިލުން މިހާރު ނިންމާފައިވަނީ ރޭމްޕުގެ ޑިޒައިން ބަދަލުކޮށް، ރޭމްޕް އެއަށްވުރެ އުސް ކުރުމަށެވެ.
