ރާއްޖޭގައި ހުރި މަތީ ސާނަވީއަށް ކާއްޞަކޮށްގެން ކިޔަވައިދޭ ހަމައެކަނި ސްކޫލް، ވިލާ އިންޓަރނޭޝަނަލް ހައި ސްކޫލުގައި 2019 ވަނަ އަހަރު ހިލޭ ކިޔެވުމުގެ ފުރުޞަތު ހުޅުވާލައިފިއެވެ.
ސްކޫލްގެ ޕްރިންސިޕަލް ސަޢީދު އަހްމަދު ވިދާޅުވީ ވިލާ އިންޓަރނޭޝަނަލް ހައި ސްކޫލަކީ ދަރިވަރުން ކިޔަވަން އައުމަށް އެންމެ އެކަށީގެންވާ ސިފަތައް ހުރި ސްކޫލެއް ކަމަށެވެ. އެގޮތުން ބަލާއިރު ކިޔަވައިދިނުމަށް އެންމެ ގިނަ ވަސީލަތްތައް ހުރި އަދި ޓީޗަރުންނަކީ އެންމެ ޤާބިލު ތަޖުރިބާހުރި އަދި ދަރިވަރުން ބޭނުންވާ ގޮތަށް ކަންކަން ކުރިއަށް ގެންދިއުމުގެ ޤާބިލުކަމާއި ހުނަރު ލިބިގެން ތިބި ޓީޗަރުން ކަމަށެވެ. އެކަން ޓީޗަރުން ވަނީ މާޒީގައި ދައްކައިދީފައި ކަމަށެވެ.
"ކްލާސްތަކަށް އިންޓަރނެޓްގެ ޚިދުމަތް ލިބޭނެ. ދަރިވަރުންނަށް ބޭނުންވާނެ ލެބޯޓްރީ ވަސީލަތްތައް އެބަހުރި. ދަރިވަރުންނަށާއި މުދައްރިސުންނަށް ބޭނުންކުރެވޭނެ ޕްލެޓްފޯމެއް ދަސްވެހީގެ ނަމުގައި ޤާއިމުކުރެވިފައިވޭ. މިވަސީލަތް މެދުވެރިކޮށް ކިޔަވައިދިނުމާއި ކިޔެވުން ކުރިއަށް ގެންދޭ. "ބެލެނިވެހި" މެދުވެރިކޮށް ދަރިވަރުން ހާޒިރުވާންޖެހޭ ކަލާސްތަކަށް ދަރިވަރުން ހާޒިރުވާކަން ބެލެނިވެރިންނަށް ގޭގައި ތިބެގެން ވެސް ބަލައިލެވޭނެ. މިއީ ދުނިޔޭގެ ކޮންމެ ތަނެއްގައި ހުރެގެންވެސް ފޯނު މެދުވެރިކޮށް ބަލައިލެވޭނެ ނިޒާމެއް."
ސަޢީދު އަހްމަދު ވިދާޅުވީ އޯލެވެލް އިން ދިވެހި އިސްލާމް ހިމެނޭ ގޮތުން 5 މާއްދާއިން ފާސްވެގެން އަންނަ އެއްވެސް ދަރިވަރަކަށް ސްކޫލް ފީ އާއިމެދު ވިސްނަން ނުޖެހޭނެ ކަމަށާއި ކިޔަވައިދެނީ މުޅިން ހިލޭ ކަމަށެވެ. އަދި ކިޔަވައިދެނީ ހަމައެކަނި މޮޅު ދަރިވަރުންނަށް ނޫން ކަމަށާއި ތަފަތު ފެންވަރުގައި އަންނަ ކުދިންނަށްވެސް ކިޔަވައިދެމުން އަންނަ ކަމަށެވެ.
"ސައިންސާއި ބިޒްނަސް ސްޓްރީމްގެ މާދާތައް ކިޔަވައިދެމުން މިގެންދަނީ. ސައިންސް ސްޓްރީމްގެ ކުދިންނަށް މެރިން ސައިންސް އަދި ބިޒްނަސް ސްޓްރީމްގެ ކުދިންނަށް ޓްރެވަލް އެންޑް ޓޫރިޒަމް ކިޔަވައިދެމުން މިގެންދަނީ. މިއީ ރާއްޖޭގެ ފަތުރުވެރިކަމާއި މަސްވެރިކަމަށް އެންމެ މުހިންމު 2 މާއްދާ."
ސައީދު ވިދާޅުވީ އެންމެ ރަނގަޅު ނަތީޖާ ހޯދާ ދަރިވަރުންނަށް ސްކޯލާޝިޕްގެ ގޮތުގައި ކޮންމެ މަހަކުވެސް ފައިސާ ދެމުން ގެންދާ ކަމަށާއި އޯ ލެވެލްގައި 1 ވަނަ ހޯދާ ކޮންމެ ދަރިވަރަކަށް ވެސް މަހަކު 1000 ރުފިޔާ ލިބޭނެ ކަމަށެވެ. 2 ވަނަ އަދި 3 ވަނަ ހޯދައިގެން އަންނަ ކޮންމެ ދަރިވަރަކަށް މަހަކު 500 ރުފިޔާ ލިބޭނެ ކަމަށެވެ. މީގެ އިތުރުން ޤައުމީ މުބާރާތްތަކާއި ކުޅިވަރުން 1 ވަނަ ހޯދައިގެން އަންނަ ކުދިންނަށްވެސް 500 ރުފިޔާގެ އެލަވަންސެއް ދެމުން ގެންދާ ކަމަށެވެ. "މި ސްކޫލުގައި ހޭދަކުރާ 2 އަހަރު ނިމެންދެން މި އެލަވަނސް ލިބެމުންދާނެ."
މީގެ އިތުރުން އެސްކޫލުން އެންމެ ރަނގަޅު ނަތީޖާ ހޯދައިގެން ވިލާ ކޮލެޖުން ކިޔަވަން ބޭނުންވާ ދަރިވަރުންނަށް ވެސް ހިލޭ ކިޔެވުމުގެ ފުރުޞަތު އޮންނަކަމަށްވެސް ސަޢީދު އަހްމަދު ވިދާޅުވިއެވެ.
ވީއައިއެޗްއެސްގައި މަތީ ސާނަވީ ތައުލީމު ހާސިލް ކުރުމަށް ބޭނުންވާ ދަރިވަރުންނަށް އެ ފުރުސަތު ހުޅުވާލާފައިވަނީ މިއަދުން ފެށިގެން 28 ވަނަ ދުވަހުގެ ނިޔަލަށެވެ. އަދި ސުކޫލްގައި ކިޔެވުން ފަށަން ނިންމާފައިވަނީ ހާއްސަ އޮރިއެންޓޭޝަން ކްލާސްތަކަކާއި އެކު ފެބްރުއަރީ މަހުގެ ތިންވަނަ ދުވަހު އެވެ.
ވިލާ އިންޓާނޭޝަނަލް ހައި ސުކޫލަށް ވަނުމަށް އެދޭ ދަރިވަރުންނަށް ފުރުސަތު ހުޅުވާލާފައިވާއިރު ސުކޫލުގެ ކިޔެވުމާއި ބެހޭ އިތުރު މައުލޫމާތުތައް ފޯރުކޮށްދިނުމުގެ ގޮތުން މި މަހުގެ 18 ވަނަ ދުވަހު ހަވީރު 4:00 އިން ރޭގަނޑު 10:00 އަކަށް އޯޕަންޑޭގެ ނަމުގައި ހާއްސަ ހަރަކާތެއް ސްކޫލުގައި ބޭއްވުމަށްވެސް ވަނީ ހަމަޖެހިފަ އެވެ.
