ޤައުމަށް ބޭނުންވަނީ ޤައުމީ ބަޠޮލުން ކުރެއްވިފަދައިން ޚިދުމަތް ކުރާނެ ދަރިން ކަމަށާއި މިއަދު ހުޅުވި ހުރަވީ ސްކޫލަކީވެސް އެ ސްކޫލުގެ ނަން އެ ރަސްކަލަކަށް ނިސްބަތްވާ، ދޮން ބަންޑާރައިން ފަދައިން، ދިވެހި ޤައުމަށް މުހިންމު ޚިދުމަތްތަކެއް ކުރާނޭ، ޒުވާން ޖީލެއް އުފައްދައިދޭނެ މުއައްސަސާއަކަށް ވާނެކަމަށް އުންމީދުކުރައްވާ ކަމަށް ރައީސްލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
ހުރަވީ ސްކޫލް ހުޅުވުމަށް މިއަދު ބޭއްވި ރަސްމިއްޔާތުގައި ރައީސް އިބްރާހީމް މުޙައްމަދު ޞާލިޙް ވިދާޅުވީ ސަރުކާރުގެ މައިގަނޑު އަމާޒަކީވެސް، ރަނގަޅު ތަޢުލީމާއި ތަމްރީން ދީގެން، އުފެއްދުންތެރި ޒުވާން ޖީލެއް ބިނާކުރުން ކަމަށާއި އެކަން ހާސިލު ކުރެވޭނީ، ތަޢުލީމީ ނިޒާމުގެ ތެރެއިން ނުކުންނަ ކޮންމެ ދަރިވަރަކީވެސް، ޞައްޙަ އިސްލާމީ ޢަޤީދާގެ މަތީގައި ތަރުބިއްޔަތުވެފައިވާ، ޚުލްޤު ހެޔޮ ދަރިވަރަކަށް ހެދިގެން ކަމަށެވެ. އަދި ކާމިޔާބުކަމާއެކުގައި، ދިރިއުޅުމަށް ބޭނުންވާ، ފުރިހަމަ ޞިއްޙަތާއި، ހުނަރާއި ޢިލްމު ލިބިފައި ހުރި ކުއްޖަކަށް ހެދިގެން ކަމަށެވެ.
ރައީސްގެ ވާހަކަފުޅުގައި ވަނީ މިއަހަރުގެ ދައުލަތުގެ މަޖެޓުން ވަރަށް ބޮޑު ބައެއް ތައުލީމީ ދާއިރާއަށް ޚާއްޞަކޮށްފައިވާކަންވެސް ފާހަގަކުރައްވައިފައެވެ.
"ހުރަވީ ސްކޫލަކީ، ރާއްޖޭގެ އެހެން ސްކޫލްތަކާ ވަރަށް ގިނަ ގޮތްގޮތުން ތަފާތު ސްކޫލެއް. މި ސްކޫލް ފަރުމާކޮށްފައިވަނީ، ވަށައިޖެހޭ ތައުލީމީ ނިޒާމަކަށް ވަރަށް އެކަށޭނަ ގޮތަކަށް. ވަސީލަތްތަކުގެ ގޮތުންނާއި، ޖާގައިގެ ގޮތުން މިއީ، އެއްދަންފަޅިއަށް ކިޔަވައިދެވޭ ގޮތަށް، ޖަޒީރާ ސްކޫލެއް ހިންގުމަށް ފައްކާކުރެވިފައިވާ އިމާރާތެއް.
މިއަދު މި ފެށުނު ދިރާސީ އަހަރުގައި، ޕްރީ ސްކޫލުން ފެށިގެން ގްރޭޑް 12އާ ހަމައަށް ޖުމްލަ ހަތްދިހަ ހާސް ތިރީސް ފަސް ދަރިވަރުން ތަޢުލީމު ހާސިލު ކުރަމުންދާނެ. އެކުދީންގެ ކިޔެވުމުގެ ކަންތައް ފުރިހަމަކުރުމަށް މިއަހަރުގެ ބަޖެޓުން، ތަޢުލީމީ ދާއިރާއަށް ވަނީ، 8.98 އިންސައްތަ ކަނޑައެޅިފައި. އެއީ ގާތްގަނޑަކަށް 2.7 ބިލިއަން ރުފިޔާ.
މިއަހަރުގެ ކިޔެވުން ފެށުނުއިރު، ސަރުކާރުގެ 213 ސްކޫލް އެބަހުރި. އޭގެ ތެރެއިން 134 ސްކޫލެއް، މި ސްކޫލް ހިމެނޭގޮތަށް، މިހާރުވަނީ އެއް ދަންފަޅިއަށް ބަދަލުކުރެވިފައި. ދެން ހުރި 79 ސްކޫލްވެސް، އެ ތަންތަނުގެ ޙާލަތު ދެނެގަތުމަށްފަހު، ވަކި މުއްދަތެއްގެ ތެރޭގައި، އެއް ދަންފަޅިއަށް އިރާދަކުރެއްވިއްޔާ ބަދަލުކުރެވޭނެ."
ރައީސް އިބްރާހީމް މުޙައްމަދު ޞާލިޙް ވިދާޅުވީ ހަމައެހެންމެ، މިހާ ފެންވަރު ރަނގަޅު ސްކޫލެއް، ހުޅުމާލޭގައި އިމާރާތް ކޮށްދެއްވީތީ، އެޗް.ޑީ.ސީ. އަށް ވަރަށް ޚާއްޞަ ޝުކުރެއް ދަންނަވާ ކަމަށެވެ. "މި ސްކޫލް އިމާރާތް ކުރުމުގައި ވަރަށް ބުރަ މަސައްކަތްތަކެއް ކޮށްދެއްވައި، މި ދުވަހަށް ސްކޫލް ނިންމައިދެއްވި ކަމަށްޓަކައި، އިމާރާތް ކުރުމުގެ ބުރަ މަސައްކަތް އުފުއްލެވި އަމިން ކޮންސްޓްރަކްޝަނާއި، އެ ކުންފުނީގެ އިސްވެރިންނަށާއި މުވައްޒަފުންނަށް އަޅުގަނޑުގެ އިޚްލާޞްތެރި ޝުކުރުވެސް ދަންނަވަން."
މި ރައީސް އިބްރާހީމް މުޙައްމަދު ޞާލިޙް ވިދާޅުވީ ހުރަވީ ސްކޫލަކީ ހުޅުމާލޭގެ މުސްތަޤްބަލް ބިނާކުރުމަށް އެޅޭ މުހިންމު ފިޔަވަޅެއް ކަމަށާއި އަދި ހުޅުމާލެއަށް ހިޖްރަކުރަން ބޭނުންވާ ޢާއިލާތަކަށް ލިބޭ އަގުހުރި ވަސީލަތެއް ކަމަށެވެ.
